O‘zbekistonga kosmetik vositalarning noqonuniy olib kirilishiga yo‘l qo‘yilmadi

Toshkent shahar bojxona boshqarmasi xodimlari tomonidan yirik miqdordagi kosmetik vositalar, parfyumeriya mahsulotlarining noqonuniy olib kirilishiga chek qo‘yildi, deb xabar qiladi O‘zbekiston Respublikasi davlat bojxona qo‘mitasi.

Jumladan, “Keles” temir yo‘l bojxona posti xodimlari “Moskva—Toshkent” yo‘nalishidagi yuk poyezdi orqali fuqaro A.Yulchiyev (maqoladagi barcha ism-shariflar o‘zgartirilgan) tomonidan umumiy qiymati 41,5 million so‘mlik turli tovar-moddiy boyliklarni, shu jumladan 1223 dona parfyumeriya va kosmetika mahsulotlarini yashirin ravishda olib kirilishining oldini oldi.

Toshkent shahar bojxona boshqarmasi xodimlari va huquqni muxofaza qiluvchi boshqa idoralar vakillari bilan hamkorlikda fuqarolar M.Asadov va A.Turdiyevlar boshqaruvidagi Damas va Cobalt avtomashinalari ko‘zdan kechirilganda, avtomashinalarda horijda ishlab chiqarilgan 8 turdagi salkam 2,5 ming dona kosmetika va parfyumeriya mahsulotlari noqonuniy ravishda olib ketilayotganiligi fosh etildi. Yuk egalari qiymati 35 million so‘mlik ushbu tovarlarning sifati va bojxona rasmiylashtiruvini tasdiqlovchi bironta ham hujjatni bojxonachilarga taqdim qila olmadi.

Shuningdek, “Toshkent-Aero” ixtisoslashtirilgan bojxona komlpeksi xodimlari tomonidan “Seul—Toshkent” reysi bo‘yicha parvozini yakunlagan namanganlik Sh.Samandarovning yuklari tekshirilganda, u 159 dona kosmetika vositalarini yashirgan holda respublikamiz hududiga olib kirishni ko‘zlagani aniqlandi.

Bundan tashqari, Moskvadan uchib kelgan qashqadaryolik A.Komilov 130 dona, surxondaryolik N.Lutfullayeva esa 66 dona kosmetika va parfyumeriya vositalarini bojxona bayonnomasida va og‘zaki so‘rovlar paytida ma’lum qilmasdan turib, olib kirishga uringan paytda to‘xtatib qolindi.

Hozirda yuqoridagi holatlar yuzasidan bojxona tekshiruvlari va surishtiruv harakatlari davom ettirilmoqda.

Toshkent bojxonachilari tomonidan huquqni muxofaza qiluvchi boshqa idoralar vakillari bilan hamkorlikda Uchtepa tumanida istiqomat qiluvchi fuqaro U.Razzoqovaning xonadoni amaldagi tartiblarga muvofiq va xolislar ishtirokida ko‘zdan kechirilganda, bu yerda fuqaro O.Yuldashevga tegishli 27 million so‘mdan ortiq qiymatdagi 17 turdagi 961 dona horijda ishlab chiqarilgan parfyumeriya vositalari noqonuniy ravishda saqlanayotganligi ma’lum bo‘ldi.

Mazkur holat bo‘yicha sud qarori bilan huquqbuzarga nisbatan tegishli jazo qo‘llanilib, daliliy ashyo sifatida olib qo‘yilgan tovarlar davlat egaligiga o‘tkazildi.