Ўзбекистонга косметик воситаларнинг ноқонуний олиб кирилишига йўл қўйилмади

Тошкент шаҳар божхона бошқармаси ходимлари томонидан йирик миқдордаги косметик воситалар, парфюмерия маҳсулотларининг ноқонуний олиб кирилишига чек қўйилди, деб хабар қилади Ўзбекистон Республикаси давлат божхона қўмитаси.

Жумладан, «Келес» темир йўл божхона пости ходимлари «Москва—Тошкент» йўналишидаги юк поезди орқали фуқаро А.Юлчиев (мақоладаги барча исм-шарифлар ўзгартирилган) томонидан умумий қиймати 41,5 миллион сўмлик турли товар-моддий бойликларни, шу жумладан 1223 дона парфюмерия ва косметика маҳсулотларини яширин равишда олиб кирилишининг олдини олди.

Тошкент шаҳар божхона бошқармаси ходимлари ва ҳуқуқни мухофаза қилувчи бошқа идоралар вакиллари билан ҳамкорликда фуқаролар М.Асадов ва А.Турдиевлар бошқарувидаги Damas ва Cobalt автомашиналари кўздан кечирилганда, автомашиналарда ҳорижда ишлаб чиқарилган 8 турдаги салкам 2,5 минг дона косметика ва парфюмерия маҳсулотлари ноқонуний равишда олиб кетилаётганилиги фош этилди. Юк эгалари қиймати 35 миллион сўмлик ушбу товарларнинг сифати ва божхона расмийлаштирувини тасдиқловчи биронта ҳам ҳужжатни божхоначиларга тақдим қила олмади.

Шунингдек, «Тошкент-Аэро» ихтисослаштирилган божхона комлпекси ходимлари томонидан «Сеул—Тошкент» рейси бўйича парвозини якунлаган наманганлик Ш.Самандаровнинг юклари текширилганда, у 159 дона косметика воситаларини яширган ҳолда республикамиз ҳудудига олиб киришни кўзлагани аниқланди.

Бундан ташқари, Москвадан учиб келган қашқадарёлик А.Комилов 130 дона, сурхондарёлик Н.Лутфуллаева эса 66 дона косметика ва парфюмерия воситаларини божхона баённомасида ва оғзаки сўровлар пайтида маълум қилмасдан туриб, олиб киришга уринган пайтда тўхтатиб қолинди.

Ҳозирда юқоридаги ҳолатлар юзасидан божхона текширувлари ва суриштирув ҳаракатлари давом эттирилмоқда.

Тошкент божхоначилари томонидан ҳуқуқни мухофаза қилувчи бошқа идоралар вакиллари билан ҳамкорликда Учтепа туманида истиқомат қилувчи фуқаро У.Раззоқованинг хонадони амалдаги тартибларга мувофиқ ва холислар иштирокида кўздан кечирилганда, бу ерда фуқаро О.Юлдашевга тегишли 27 миллион сўмдан ортиқ қийматдаги 17 турдаги 961 дона ҳорижда ишлаб чиқарилган парфюмерия воситалари ноқонуний равишда сақланаётганлиги маълум бўлди.

Мазкур ҳолат бўйича суд қарори билан ҳуқуқбузарга нисбатан тегишли жазо қўлланилиб, далилий ашё сифатида олиб қўйилган товарлар давлат эгалигига ўтказилди.