O‘zbekiston Xotin-qizlar qo‘mitasida Xalqaro oila kuni munosabati bilan “Oilam — baxtu saodatim manbai” mavzusida videomuloqot o‘tkazildi, deya xabar bermoqda “Oila davrasida” gazetasi.
Unda Qoraqalpog‘iston Respublikasi Xotin-qizlar qo‘mitasining ma’lumot berishicha, o‘tgan yili o‘n ikki nafar, joriy yilning o‘tgan davrida esa to‘rt nafar qiz o‘g‘irlangan.
— Qiz o‘g‘irlash bizning xalqimizda urf-odat darajasidagi an’ana degan noto‘g‘ri dunyoqarash shakllanib qolgan, — dedi Qoraqalpog‘iston Respublikasi Xotin-qizlar qo‘mitasi raisi Zuhra Ibrohimova.
Bundan tashqari, Respublika Xotin-qizlar qo‘mitasi raisi Elmira Bositxonova so‘zlariga ko‘ra, Respublika miqyosida qayd etilgan nikohlar soni yildan-yilga ortib boryapti, lekin oilaviy ajrimlar soni ham kam emas.
— Bundan birinchi navbatda ayollar, yoshlar va bolalar aziyat chekadi, jamiyatning ma’naviy rivojiga putur yetadi. Oilalarning buzilish sabablari o‘rganilganda ko‘proq yoshlarimizning oila qurishga tayyor emasligi, sog‘lig‘iga e’tiborsizligi, yigitlarimizning oilani boshqarish, ro‘zg‘orni moddiy ta’minlash, farzandlarini tarbiyalash mas’uliyatini his etmasliklari, qizlarimiz esa uy bekasi, onalik vazifalarini tushunmasliklari sabab bo‘layotgani ma’lum bo‘ldi, — dedi Elmira Bositxonova. — Aksariyat ajrashganlar 20-25 yosh atrofidagi yigit-qizlar. Eng achinarlisi, ular bir-bir yarim yil turmush qurishgan, xolos. Tahlillar shuni ko‘rsatadiki, ajrashish holatlarining 18 foizi oiladagi kelishmovchiliklar, 22 foizi o‘zaro muhabbatning yo‘qligi, fe’l-atvorlarning to‘g‘ri kelmasligi, qolganlari esa farzandsizlik, er yoki xotinning kasalligi, yigitlarning ichkilikbozlikka berilib ketishi oqibatida kelib chiqqan.
Qo‘shimcha: “Oila davrasida” gazetasidan olingan maqolada videomuloqot mavzusi noto‘g‘ri ko‘rsatilgani uchun gazeta tahririyatidan va mushtariylardan uzr so‘rab qolamiz. Xatolik to‘g‘rilandi.
Izoh (0)