Ўзбекистон Хотин-қизлар қўмитасида Халқаро оила куни муносабати билан «Оилам — бахту саодатим манбаи» мавзусида видеомулоқот ўтказилди, дея хабар бермоқда «Оила даврасида» газетаси.
Унда Қорақалпоғистон Республикаси Хотин-қизлар қўмитасининг маълумот беришича, ўтган йили ўн икки нафар, жорий йилнинг ўтган даврида эса тўрт нафар қиз ўғирланган.
— Қиз ўғирлаш бизнинг халқимизда урф-одат даражасидаги анъана деган нотўғри дунёқараш шаклланиб қолган, — деди Қорақалпоғистон Республикаси Хотин-қизлар қўмитаси раиси Зуҳра Иброҳимова.
Бундан ташқари, Республика Хотин-қизлар қўмитаси раиси Эльмира Боситхонова сўзларига кўра, Республика миқёсида қайд этилган никоҳлар сони йилдан йилга ортиб боряпти, лекин оилавий ажримлар сони ҳам кам эмас.
— Бундан биринчи навбатда аёллар, ёшлар ва болалар азият чекади, жамиятнинг маънавий ривожига путур етади. Оилаларнинг бузилиш сабаблари ўрганилганда кўпроқ ёшларимизнинг оила қуришга тайёр эмаслиги, соғлиғига эътиборсизлиги, йигитларимизнинг оилани бошқариш, рўзғорни моддий таъминлаш, фарзандларини тарбиялаш масъулиятини ҳис этмасликлари, қизларимиз эса уй бекаси, оналик вазифаларини тушунмасликлари сабаб бўлаётгани маълум бўлди, — деди Эльмира Боситхонова. — Аксарият ажрашганлар 20-25 ёш атрофидаги йигит-қизлар. Энг ачинарлиси, улар бир-бир ярим йил турмуш қуришган, холос. Таҳлиллар шуни кўрсатадики, ажрашиш ҳолатларининг 18 фоизи оиладаги келишмовчиликлар, 22 фоизи ўзаро муҳаббатнинг йўқлиги, феъл-атворларнинг тўғри келмаслиги, қолганлари эса фарзандсизлик, эр ёки хотиннинг касаллиги, йигитларнинг ичкиликбозликка берилиб кетиши оқибатида келиб чиққан.
Қўшимча: «Оила даврасида» газетасидан олинган мақолада видеомулоқот мавзуси нотўғри кўрсатилгани учун газета таҳририятидан ва муштарийлардан узр сўраб қоламиз. Хатолик тўғриланди.
Изоҳ (0)