Xotin-qizlar qo‘mitasida o‘tkazilgan videomuloqotda Qoraqalpog‘istondagi qiz o‘g‘irlash an’anasi qoralandi

O‘zbekiston Xotin-qizlar qo‘mitasida Xalqaro oila kuni munosabati bilan “Oilam — baxtu saodatim manbai” mavzusida videomuloqot o‘tkazildi, deya xabar bermoqda “Oila davrasida” gazetasi.

Qoraqalpog‘iston Respublikasi Xotin-qizlar qo‘mitasining ma’lumot berishicha, o‘tgan yili o‘n ikki nafar, joriy yilning o‘tgan davrida esa to‘rt nafar qiz o‘g‘irlangan.

— Qiz o‘g‘irlash bizning xalqimizda urf-odat darajasidagi an’ana degan noto‘g‘ri dunyoqarash shakllanib qolgan, — dedi Qoraqalpog‘iston Respublikasi Xotin-qizlar qo‘mitasi raisi Zuhra Ibrohimova. — Bu udumning noto‘g‘riligini, qiz bilan yigit faqatgina kattalarning sovchiligi va roziligidan so‘ng tibbiy ko‘rikdan o‘tib, nikohlanishlari zarurligini tushuntiryapmiz. Bunday hodisalar ancha kamayishiga erishdik ham. Ammo raqamlardan ko‘rinib turibdiki, bu muammo hamon uchramoqda.