Ўзбекистонда электрон тижорат тўғрисидаги янги қонун кучга кирди

Ўзбекистон Президенти Ислом Каримов 22 май куни янги таҳрирдаги «Электрон тижорат тўғрисида»ги қонунни имзолади, дея хабар бермоқда «Газета.uz». Ҳужжат матни «Халқ сўзи» газетасида чоп этилди.

У Олий Мажлис Қонунчилик палатаси томонидан 17 апрелда қабул қилинган, 15 майда Сенат томонидан тасдиқланган эди. Қонун 23 майдан кучга кирди.

Ҳужжатда белгиланишича, ахборот тизимларидан фойдаланган ҳолда тузиладиган шартномага мувофиқ амалга ошириладиган товарлар (ишлар, хизматлар) олди-сотдиси электрон тижоратдир.

Электрон тижоратнинг асосий принциплари қуйидагилардан иборат:

электрон тижоратда тадбиркорлик фаолиятини амалга ошириш эркинлиги;электрон тижоратда шартномалар тузишнинг ихтиёрийлиги;электрон тижоратда иштирок этиш шарт-шароитларининг тенглиги;электрон тижорат иштирокчиларининг ҳуқуқлари ва қонуний манфаатлари ҳимоя қилиниши.

Электрон тижоратдаги электрон ҳужжатлар, шунингдек электрон шаклда қайд этилган, юборувчисини идентификация қилиш имкониятини берадиган ахборот (бундан буён матнда электрон хабарлар деб юритилади) ўз қўли билан имзоланган қоғоздаги ҳужжатларга тенглаштирилади ва улардан битимлар тузилганлигининг далили сифатида фойдаланилиши мумкин.

Электрон тижоратдаги шартнома фақат ахборот тизимларидан фойдаланилган ҳолда тузилганлигига асосланиб ҳақиқий эмас деб топилиши мумкин эмас.

Электрон тижоратда оферта электрон ҳужжат тарзида тузилади.

Электрон тижорат иштирокчисининг оферта қабул қилинганлиги тўғрисидаги жавоби (аксепт) электрон ҳужжат ёки электрон хабар тарзида ёхуд офертада кўрсатилган шартларни бажариш бўйича ҳаракатларни содир этиш йўли билан амалга оширилиши мумкин.

Қонунда қайд этилишича, электрон тижоратда товарларни (ишларни, хизматларни) сотувчи ёки уларнинг харидори бўлган юридик ёки жисмоний шахс электрон тижорат иштирокчисидир.

Электрон тижоратда товарларни (ишларни, хизматларни) сотувчи юридик шахс ёки якка тартибдаги тадбиркор ҳисобланади.

Электрон тижоратда иштирок этиш, агар қонунда бошқача қоида белгиланмаган бўлса, унинг иштирокчисига нисбатан ахборот тизимларидан фойдаланмасдан амалга оширилаётган тадбиркорлик фаолиятига нисбатан қўшимча талаблар ёки чекловлар белгиланиши учун асос бўла олмайди.

Шунингдек ҳужжатда электрон тижорат иштирокчисининг ҳуқуқ ва мажбуриятлари, ахборот воситачисининг ҳуқуқ ва мажбуриятлари, электрон тижоратдаги шартнома шартлари, электрон тижоратда офертага қўйиладиган талаблар ва бошқа тафсилотлар келтириб ўтилган.