Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamentining Bekobod tuman bo‘limi tomonidan o‘tkazilgan tadbirda tumandagi “Xos” fermerlar uyushmasi hududida istiqomat qiluvchi fuqaro turmush o‘rtog‘i bilan qo‘lbola usulda chigitdan yog‘ ishlab chiqarayotganligi aniqlandi, deb xabar qiladi “Huquq” gazetasi.
Ular noma’lum shaxsdan 861 kg chigit sotib olib, elektr tarmog‘iga noqonuniy ulangan holda faoliyat olib borgan. Er-xotin tomonidan ishlab chiqarilgan 180 kg yog‘ning tarkibi tekshirilganda, uning iste’molga yaroqsiz, inson sog‘lig‘i uchun xavfli ekanligi ma’lum bo‘ldi. Shuningdek, ushbu faoliyat natijasida tuman elektr tarmoqlari korxonasiga 1 million 670 so‘mlik zarar yetkazilgan.
Tumandagi “G‘alaba” fermerlar uyushmasida yashovchi boshqa bir fuqaro ham o‘zboshimchalik bilan elektr tarmog‘iga ulanib, qo‘lbola usulda yog‘ ishlab chiqarib, sotishni maqsad qilgan ekan. U Sirdaryo viloyatidagi notanish shaxslardan 472 kg chigit xarid qilib, o‘zining noqonuniy faoliyatini boshlaydi. Vaqtida ko‘rilgan chora-tadbirlar tufayli u maqsadiga erisha olmadi.
Mazkur ikki holat bo‘yicha jinoyat ishi qo‘zg‘atilib, sud hukmi bilan aybdorlarga tegishli jazo tayinlandi.
Izoh (0)