Солиқ, валютага оид жиноятларга ва жиноий даромадларни легаллаштиришга қарши курашиш (СВОЖЖДЛҚК) департаментининг Бекобод туман бўлими томонидан ўтказилган тадбирда тумандаги «Хос» фермерлар уюшмаси ҳудудида истиқомат қилувчи фуқаро турмуш ўртоғи билан қўлбола усулда чигитдан ёғ ишлаб чиқараётганлиги аниқланди, деб хабар қилади «Ҳуқуқ» газетаси.
Улар номаълум шахсдан 861 кг чигит сотиб олиб, электр тармоғига ноқонуний уланган ҳолда фаолият олиб борган. Эр-хотин томонидан ишлаб чиқарилган 180 кг ёғнинг таркиби текширилганда, унинг истеъмолга яроқсиз, инсон соғлиғи учун хавфли эканлиги маълум бўлди. Шунингдек, ушбу фаолият натижасида туман электр тармоқлари корхонасига 1 миллион 670 сўмлик зарар етказилган.
Тумандаги «Ғалаба» фермерлар уюшмасида яшовчи бошқа бир фуқаро ҳам ўзбошимчалик билан электр тармоғига уланиб, қўлбола усулда ёғ ишлаб чиқариб, сотишни мақсад қилган экан. У Сирдарё вилоятидаги нотаниш шахслардан 472 кг чигит харид қилиб, ўзининг ноқонуний фаолиятини бошлайди. Вақтида кўрилган чора-тадбирлар туфайли у мақсадига эриша олмади.
Мазкур икки ҳолат бўйича жиноят иши қўзғатилиб, суд ҳукми билан айбдорларга тегишли жазо тайинланди.
Изоҳ (0)