Buyuk Britaniya bosh vaziri Devid Kemeron Shotlandiya byudjeti Birlashgan Qirollikning qolgan qismidan alohida shakllantirilishini samarasiz g‘oya deb hisoblaydi. U bu haqda, “Vedomosti”ning xabar berishicha, Shotlandiya birinchi vaziri Nikola Starjen bilan olib borilgan muzokaralar vaqtida ma’lum qilgan.
“Men Shotlandiya uchun to‘liq fiskal muxtoriyat joriy etilishini ma’qullamayman”, - dedi u. Ayni vaqtda u Shotlandiyaga nisbatan ko‘proq muxtoriyat huquqi berilishi doirasida biznesni soliqqa tortish, ijtimoiy ta’minot va eng kam ish haqi masalasida o‘zgartishlar kiritish borasidagi Starjen tomonidan ilgari surilgan takliflarga rozi bo‘ldi.
Bosh vazir Shotlandiya mustaqilligi masalasida o‘tkazilgan referendumdan so‘ng tashkil etilgan Smit komissiyasi ilgari surgan, Shotlandiyaning yanada ko‘proq mustaqilligini ta’minlashga qaratilgan takliflarni to‘liq bajarishga ham rozi bo‘ldi.
“Ushbu takliflarning amalga oshirilishi Shotlandiya parlamentiga yanada ko‘proq vakolatlar beradi. Men, albatta, boshqa takliflarni ko‘rib chiqishdan ham mamnun bo‘laman”, - deya qo‘shimcha qildi Buyuk Britaniya bosh vaziri Devid Kemeron.
Ayni vaqtda, u Shotlandiya mustaqilligi masalasi yuzasidan yana bir referendum o‘tkazilishi ehtimolini rad etdi, deya xabar bermoqda “Interfaks”.
Starjen rahbarlik qilayotgan Shotlandiya milliy partiyasi yaqinda bo‘lib o‘tgan Buyuk Britaniya parlament saylovlarida ishonchli g‘alabani qo‘lga kiritdi.
Shotlandiya mustaqilligi masalasi yuzasidan 2014-yil 18-sentyabrda o‘tkazilgan referendumda hududning 55,3 foiz aholisi mustaqillikka qarshi ovoz berdi. 44,7 foiz shotlandiyaliklar esa mustaqillik bo‘lish uchun ovoz berdi.
Izoh (0)