Буюк Британия бош вазири Дэвид Кэмерон Шотландия бюджети Бирлашган Қиролликнинг қолган қисмидан алоҳида шакллантирилишини самарасиз ғоя деб ҳисоблайди. У бу ҳақда, «Ведомости»нинг хабар беришича, Шотландия биринчи вазири Никола Старжен билан олиб борилган музокаралар вақтида маълум қилган.
«Мен Шотландия учун тўлиқ фискал мухторият жорий этилишини маъқулламайман», - деди у. Айни вақтда у Шотландияга нисбатан кўпроқ мухторият ҳуқуқи берилиши доирасида бизнесни солиққа тортиш, ижтимоий таъминот ва энг кам иш ҳақи масаласида ўзгартишлар киритиш борасидаги Старжен томонидан илгари сурилган таклифларга рози бўлди.
Бош вазир Шотландия мустақиллиги масаласида ўтказилган референдумдан сўнг ташкил этилган Смит комиссияси илгари сурган, Шотландиянинг янада кўпроқ мустақиллигини таъминлашга қаратилган таклифларни тўлиқ бажаришга ҳам рози бўлди.
«Ушбу таклифларнинг амалга оширилиши Шотландия парламентига янада кўпроқ ваколатлар беради. Мен, албатта, бошқа таклифларни кўриб чиқишдан ҳам мамнун бўламан», - дея қўшимча қилди Буюк Британия бош вазири Дэвид Кэмерон.
Айни вақтда, у Шотландия мустақиллиги масаласи юзасидан яна бир референдум ўтказилиши эҳтимолини рад этди, дея хабар бермоқда «Интерфакс».
Старжен раҳбарлик қилаётган Шотландия миллий партияси яқинда бўлиб ўтган Буюк Британия парламент сайловларида ишончли ғалабани қўлга киритди.
Шотландия мустақиллиги масаласи юзасидан 2014 йил 18-сентябрда ўтказилган референдумда ҳудуднинг 55,3 фоиз аҳолиси мустақилликка қарши овоз берди. 44,7 фоиз шотландияликлар эса мустақиллик бўлиш учун овоз берди.
Изоҳ (0)