Gollivud aktrisasi Demi Murning umumiy qiymati kamida 200 ming dollar bo‘lgan liboslari o‘g‘irlandi. Bu haqda TMZ portali xabar bermoqda.
O‘g‘rilar olib ketgan liboslar juda ham qimmat bo‘lgan. Politsiya detektivi Jo Riosning ma’lum qilishicha, hozirgi vaqtda Murning yordamchilari o‘g‘irlangan buyumlar ro‘yxatini tuzishmoqda, yakuniy ro‘yxat ma’lum bo‘lganidan so‘ng zarar miqdori sezilarli oshishi mumkin.
Aktrisaga yaqin manbaning ma’lum qilishicha, hodisa joyida qulfni buzib kirish alomatlari aniqlanmagan. Murning yordamchilaridan birortasi so‘nggi olti oydan beri omborxonaga tashrif buyurmagani ham o‘g‘rilarni topishni qiyinlashtirmoqda. Ya’ni, jinoyat 2014-yilda amalga oshirilgan bo‘lishi ham mumkin, bu yerdagi kuzatuv kameralari esa bunchalik uzoq muddat oralig‘i uchun yozuvlar tarixini saqlab qolmaydi.
Fevral oyida Gollivud aktrisasi Lyupita Niongoning dur qo‘shib tikilgan libosi o‘g‘irlab ketilgan edi. O‘g‘rilar uning yo‘qligidan foydalanib, xonasiga kirishgan va qiymati 150 ming dollarga baholangan ko‘ylakni olib chiqib ketishgan.
O‘g‘rilardan muntazam jabr ko‘radigan mashhurlar orasida Peris Hilton ham bor. 2013-yili uning uyiga yettinchi marta o‘g‘ri tushgandi: bir guruh qizlar Hiltonning yotoqxonasiga yashirincha kirib, binodan bikini, sumkachalar va boshqa buyumlarni olib chiqib ketgan edi.
Izoh (0)