Shveysariyaning Nestle kompaniyasi Ukraina prezidenti Pyotr Poroshenkoga tegishli Roshen qandolat korporatsiyasini sotib olishga qiziqish bildirgan yagona xaridor bo‘ldi. Bu haqda Segodnya.ua xabar bermoqda.
Bloomberg ma’lumotlariga ko‘ra, Nestle Ukraina qandolat gigantini 1 milliard dollarga sotib olishga tayyor. Ayni vaqtda, Poroshenko o‘z korporatsiyasini 3 milliard dollardan kamiga sotmoqchi emas.
Ukraina prezidenti ma’muriyatidan ma’lum qilishlaricha, Roshen’ni sotish bo‘yicha muzokaralar davom etmoqda. “Muzokaralar davom etmoqda, biroq xaridorlar soni shunchaki emas, balki dahshatli darajada kam”, - dedi ma’muriyat rahbari Boris Lojkin.
Eslatib o‘tamiz, Pyotr Poroshenko Roshen’ning asoschisi hisoblanadi va bu uning eng asosiy mulkidir. U prezident etib saylanishidan avval korporatsiyani sotishga va’da bergani bo‘lsa-da, hozirga qadar bu va’da bajarilgani yo‘q.
Poroshenkoning ta’kidlashicha, u hozirgi vaqtda na yuridik va na boshqa yo‘l bilan Roshen’ga ta’sir o‘tkazyapti. Uning so‘zlariga ko‘ra, Roshen’ni sotish ishlari bilan Rothschild kompaniyasi shug‘ullanmoqda.
Izoh (0)