Голливуд актрисаси Деми Мурнинг умумий қиймати камида 200 минг доллар бўлган либослари ўғирланди. Бу ҳақда TMZ портали хабар бермоқда.
Ўғирланган буюмлар Голливуднинг шимолий қисмида жойлашган омборхонада сақланаётган эди. Уларнинг ўғирланганини актрисанинг ёрдамчиларидан бири 4 май куни пайқаган. Ҳозирги вақтда полиция ҳодиса юзасидан тергов-суриштирув ҳаракатларини олиб бормоқда.
Ўғрилар олиб кетган либослар жуда ҳам қиммат бўлган. Полиция детективи Жо Риоснинг маълум қилишича, ҳозирги вақтда Мурнинг ёрдамчилари ўғирланган буюмлар рўйхатини тузишмоқда, якуний рўйхат маълум бўлганидан сўнг зарар миқдори сезиларли ошиши мумкин.
Актрисага яқин манбанинг маълум қилишича, ҳодиса жойида қулфни бузиб кириш аломатлари аниқланмаган. Мурнинг ёрдамчиларидан бирортаси сўнгги олти ойдан бери омборхонага ташриф буюрмагани ҳам ўғриларни топишни қийинлаштирмоқда. Яъни, жиноят 2014 йилда амалга оширилган бўлиши ҳам мумкин, бу ердаги кузатув камералари эса бунчалик узоқ муддат оралиғи учун ёзувлар тарихини сақлаб қолмайди.
Февраль ойида Голливуд актрисаси Люпита Нионгонинг дур қўшиб тикилган либоси ўғирлаб кетилган эди. Ўғрилар унинг йўқлигидан фойдаланиб, хонасига киришган ва қиймати 150 минг долларга баҳоланган кўйлакни олиб чиқиб кетишган.
Ўғрилардан мунтазам жабр кўрадиган машҳурлар орасида Перис Ҳилтон ҳам бор. 2013 йили унинг уйига еттинчи марта ўғри тушганди: бир гуруҳ қизлар Ҳилтоннинг ётоқхонасига яширинча кириб, бинодан бикини, сумкачалар ва бошқа буюмларни олиб чиқиб кетган эди.
Изоҳ (0)