Rossiya AQSHning Obamadan keyingi prezidenti Vashington va Moskva o‘rtasidagi munosabatlarni tiklay olishiga umid qiladi. Bu haqda, RBC.ru xabariga ko‘ra, Rossiya prezidenti Vladimir Putinning matbuot kotibi Dmitriy Peskov NBC’ga bergan intervyusida aytib o‘tgan.
“Kim Amerika prezidenti etib saylanishidan qat’iy nazar, bu odam mamlakatlarimiz o‘rtasidagi ikki tomonlama munosabatlarning qayta tiklanishi ustida ishlaydi, deb ishongimiz keladi”, - dedi Peskov.
“Biz sizning tanlovingizga hurmat bilan munosabatda bo‘lamiz va ikki tomonlama munosabatlarimizda kuzatiladigan eng kichik ijobiy o‘zgarishlarni ham xursandchilik bilan qabul qilamiz”, - deya qo‘shimcha qildi Putin matbuot kotibi.
Putin sobiq davlat kotibi Hillari Klinton AQSH prezidenti etib saylansa, u bilan ishlay oladimi qabilida berilgan savolga javob berarkan, Peskov Rossiya davlati yetakchisi “juda pragmatik” va “har doim hamkorlik uchun ochiq va yaxshi munosabatlarni tiklashga tarafdor” inson ekanligini qayd etib o‘tdi.
Matbuot kotibining qo‘shimcha qilishicha, “amerikalik siyosatchilar, afsuski, Rossiyada bo‘layotgan hodisalar haqida to‘liq axborot ololmayapti”. Peskov AQSHda 2016 yili bo‘lib o‘tadigan prezident saylovini nazarda tutgan holda, “Kreml AQSHning ichki ishlariga aralashmasligini” qayd etib o‘tdi.
Hillari Klinton AQSH Demokratik partiyasidan mamlakat prezidentligi uchun eng asosiy nomzod hisoblanadi. Respublikachilar orasida esa Floridaning sobiq gubernatori Jeb Bush va Nyu-Jersining amaldagi gubernatori Kris Kristi asosiy da’vogar sifatida ko‘rilmoqda, biroq ular hozircha saylovoldi kampaniyasiga qo‘shilganliklari haqida rasman bayonot berganicha yo‘q.
Peskov o‘z intervyusida AQSH va Rossiya alohida-alohida hal qila olmaydigan muammolar, masalan, “terrorizmga qarshi kurash” masalasi borligini qayd etib o‘tdi. “Biz ochiqmiz va bundan keyin ham muloqot uchun ochiq qolamiz, biroq tangoni bir kishi o‘ynay olmaydi. Agar Vashington buni xohlamasa, Vashingtonning qandaydir burchaklarida bunga tayyorgarlik tug‘ilmagunicha kutishga sabrimiz yetadi”, - dedi Peskov.
Putinning matbuot kotibi so‘zlariga ko‘ra, Rossiya milliy manfaatlariga daxldor masalalarda Moskvaning yon bermasligini agressiya deb hisoblamaslik kerak. Shuningdek, Peskov AQSHning Yevropa davlatlari hukumatlarini Moskvadagi G‘alaba paradini boykot qilishga urinishini ham qoraladi. “Ba’zida biz Vashington bu ishlarni nima uchun qilayotganini shunchaki tushunmay qolamiz”, - dedi Peskov.
Izoh (0)