Gollandiya UEFAning fair-play reytingida birinchi o‘rinni egalladi. Bu haqda UEFA rasmiy saytida xabar berilgan. “TASS”ning ma’lum qilishicha, ushbu reyting 2014-yilning 1-mayidan 2015-yil 30-apreligacha bo‘lgan muddatda UEFA bayrog‘i ostida klublar va terma jamoalar o‘rtasida o‘tkazilgan barcha 1995 uchrashuv asosida tuzib chiqilgan.
Ro‘yxatda ikkinchi va uchinchi o‘rinlarni mos ravishda Angliya va Irlandiya egallagan, Rossiya esa 22-pog‘onadan joy olgan. Reytingni tuzishda vakillari bir mavsum davomida UEFA bayrog‘i ostidagi musobaqalarda kamida 37ta o‘yin o‘tkazgan milliy uyushmalar hisobga olingan.
UEFAning 2015/2016-yilgi mavsumga mo‘ljallangan klublar o‘rtasidagi musobaqalari reglamentiga ko‘ra, fair-play reytingida dastlabki uchta o‘rinni band etgan mamlakatlar Yevropa Ligasida qo‘shimcha bitta o‘ringa ega bo‘lishadi.
UEFA mutaxassislari fair-play baholarini qo‘yishda o‘yinga ijobiy munosabatda bo‘lish, raqib va hakamlarni hurmat qilish, ishqibozlar va jamoa vakillarining xulqi, shuningdek, sariq va qizil kartochkalarning soni kabi ko‘rsatkich va jihatlarni e’tiborga olishadi.
Izoh (0)