2013-yilda “Xonqa don mahsulotlari” aksiyadorlik jamiyati raisi etib tayinlangan shaxs mansab kursisiga o‘tirishi bilanoq o‘z xizmat vazifalariga ko‘z yumdi, deb xabar qiladi “Huquq” gazetasi.
U maqsadini bir o‘zi amalga oshira olmasligi sababli jamiyat ishchi-xizmatchilarini birma-bir tanlovdan o‘tkazib, o‘ziga ma’qullarini yoniga oldi. Uning topshirig‘iga binoan 500 tonna bug‘doy tegirmon sexiga hech qanday hujjatlarsiz o‘tkazildi. Bug‘doydan olingan 374 tonna un Gurlan, Hazorasp, Bog‘ot tumanlari aholisiga har bir qopi 35−40 ming so‘mdan sotib yuborildi.
Rais “Qoraqum” don qabul qilish maskanidan jamiyat elevatoriga keltirilgan bug‘doyning 200 tonnasini savdo do‘koniga tushirib, xaridorlarga kelishilgan narxda sotishga muvaffaq bo‘ldi. Tushgan pul esa sheriklar bilan “arra” qilindi.
Jamiyatga qarashli non va non mahsulotlari ishlab chiqarish obyekti qurilishida 12 million so‘mga yaqin mablag‘ talon-taroj qilindi. 2013-yilning avgustida qurilish ishlari uchun bankdan 366 million 200 ming so‘m kredit olindi, amalda esa bu pullar butkul boshqa ishlarga sarflandi.
Qonun himoyachilarining sa’y-harakatlari bilan “Xonqa don mahsulotlari” raisi va sheriklarining qilmishi fosh etildi. Jamiyat raisi rahbarligidagi 15 kishidan iborat jinoiy guruh tomonidan davlat va jamiyat manfaatlariga juda ko‘p miqdorda zarar keltirilganligi aniqlandi.
“Xonqa don mahsulotlari” raisi va uning sheriklariga nisbatan jazo muqarrarligi ta’minlandi.
Izoh (0)