«Хонқа дон маҳсулотлари» раиси бошчилигидаги жиноий гуруҳ фош этилди

2013 йилда «Хонқа дон маҳсулотлари» акциядорлик жамияти раиси этиб тайинланган шахс мансаб курсисига ўтириши биланоқ ўз хизмат вазифаларига кўз юмди, деб хабар қилади «Ҳуқуқ» газетаси.

У мақсадини бир ўзи амалга ошира олмаслиги сабабли жамият ишчи-хизматчиларини бирма-бир танловдан ўтказиб, ўзига маъқулларини ёнига олди. Унинг топшириғига биноан 500 тонна буғдой тегирмон цехига ҳеч қандай ҳужжатларсиз ўтказилди. Буғдойдан олинган 374 тонна ун Гурлан, Ҳазорасп, Боғот туманлари аҳолисига ҳар бир қопи 35−40 минг сўмдан сотиб юборилди.

Раис «Қорақум» дон қабул қилиш масканидан жамият элеваторига келтирилган буғдойнинг 200 тоннасини савдо дўконига тушириб, харидорларга келишилган нархда сотишга муваффақ бўлди. Тушган пул эса шериклар билан «арра» қилинди.

Жамиятга қарашли нон ва нон маҳсулотлари ишлаб чиқариш объекти қурилишида 12 миллион сўмга яқин маблағ талон-тарож қилинди. 2013 йилнинг августида қурилиш ишлари учун банкдан 366 миллион 200 минг сўм кредит олинди, амалда эса бу пуллар буткул бошқа ишларга сарфланди.

Қонун ҳимоячиларининг саъй-ҳаракатлари билан «Хонқа дон маҳсулотлари» раиси ва шерикларининг қилмиши фош этилди. Жамият раиси раҳбарлигидаги 15 кишидан иборат жиноий гуруҳ томонидан давлат ва жамият манфаатларига жуда кўп миқдорда зарар келтирилганлиги аниқланди.

«Хонқа дон маҳсулотлари» раиси ва унинг шерикларига нисбатан жазо муқаррарлиги таъминланди.