Putin ota-onasi urushda qanday qilib omon qolgani haqida hikoya qildi

Rossiya prezidenti Vladimir Putin “Russkiy pioner” jurnaliga yozgan maqolasida Ikkinchi jahon urushida jang qilgan otasi va front ortida qolgan onasining kechmishlari, ularning qanday qilib omon qolganliklari haqida hikoya qildi. Bu haqda “RIA Novosti” xabar bermoqda.

Putinning so‘zlariga ko‘ra, uning otasi ham, onasi ham Ikkinchi jahon urushida baxtli tasodif tufayli omon qolgan, shunga qaramay, nemis askarlariga nisbatan adovat bilan qaramagan, chunki ular ham aslida vaziyat qurboni ekanligini Putinning ota-onasi yaxshi his qilgan.

Putinning so‘zlariga ko‘ra, uning otasi harbiy zavodda ishlagan va urushga bormaslik imtiyoziga ega bo‘lgan, biroq u o‘z xohishi bilan ariza yozib, urushga ketgan. Uni diversion otryadlardan biriga joylashtirishgan va janglardan birida u yaralangan.

“Otam uni qanday yarador qilishgani haqida so‘zlab bergan. Og‘ir jarohat olgan. U bir umr oyog‘idagi snaryad parchalari bilan yashadi: ularni hammasini chiqarib olishmagandi. Oyog‘i og‘rirdi, oyoq kafti keyin ham to‘g‘ri bo‘lmadi. Suyaklarga zarar yetmasligi uchun mayda snaryad parchalariga tegmaslikka qaror qilingandi. Shukrki, oyoqni saqlab qolishgandi, vaholanki, kesib tashlashlari ham mumkin edi. Yaxshi shifokor uchrab qolgan”, - deb yozadi Putin.

“Otamga yurishga ruxsat berishganidan so‘ng, u qo‘ltiqtayoqda uyga qaytgan. Uyga kelsa, podyezddan jasadlarni olib chiqishyapti. Onamni ko‘rgan. Yaqin kelib, qarasa, u nafas olyapti. Sanitarga qarab: “U hali tirik-ku!”, - desa, ular: “Yo‘lda tamom bo‘ladi, omon qolmaydi”, - deyishgan. Otamning aytishicha, u qo‘ltiqtayoqlari bilan ularga tashlanib, onamni xonadonga qaytib olib kirishga majbur qilgan”, - deydi Putin.

“Sanitarlar otamga: “Mayli, nima desang shu, lekin bilib qo‘y, biz bu yerga ikki-uch-to‘rt hafta davomida kelmaymiz. Ana o‘shanda o‘zingdan ko‘r”, - deb chiqib ketishgan. Onam shunday qilib omon qolgan. 1999 yilga qadar yashadi. Otam esa 1998 yil so‘ngida vafot etgandi”, - deya qo‘shimcha qiladi Putin.

“RIA Novosti”ning qayd etishicha, Rossiya prezidenti Vladimir Putinning maqolalari bundan avval ham “Russkiy pioner” jurnalida chop etilgan.