Qozog‘iston Yevroosiyo iqtisodiy ittifoqida yagona valyuta joriy etilishi imkoniyatini istisno qiladi. Bu haqda Qozog‘iston milliy iqtisodiyot vaziri o‘rinbosari Timur Jaksilikov ma’lum qildi, deya xabar bermoqda Newskaz.ru.
“Qozog‘iston Yevroosiyo iqtisodiy ittifoqi doirasida yagona va davlatusti valyuta joriy qilinishi imkoniyatini istisno qilish bo‘yicha aniq va izchil pozitsiyaga ega. Biz bu masalalarni muhokama qilmaymiz, bu kun tartibidagi masala emas”, - dedi Jaksilikov.
Uning qayd etishicha, Yevroosiyo iqtisodiy ittifoqi doirasida valyuta ittifoqini shakllantirish va yagona davlatusti valyuta joriy etish haqidagi nizom ko‘zda tutilmagan.
“Bu borada ish olib borilmaydi. Ayni vaqtda, Yevroosiyo iqtisodiy ittifoqi doirasida 2025-yilga qadar moliya bozorlarini tartibga solish sohasidagi qonunchilikni mutanosiblashtirishni maqsad qilganmiz”, - dedi vazir o‘rinbosari.
“Bu yerda qandaydir monetar yoki valyuta ittifoqi va uning istiqboli haqida so‘z borayotgani yo‘q”, - deya qo‘shimcha qildi Jaksilikov.
Rossiya, Belarus va Qozog‘iston 2014-yilning 29-may kuni Ostonada Yevroosiyo iqtisodiy ittifoqi to‘g‘risidagi bitimni imzolashgan edi, bitim 2015-yil 1-yanvardan kuchga kirdi. 2-yanvar kuni ittifoqqa Armaniston qo‘shildi, may oyida esa Qirg‘izistonning qo‘shilishi kutilmoqda.
Izoh (0)