Mursiyning o‘g‘li otasining Misr hokimiyati tepasiga qaytish niyatini ma’lum qildi

Misr sobiq prezidenti Muhammad Mursiyga nisbatan chiqarilgan 20 yilga ozodlikdan mahrum etish to‘g‘risidagi hukm uning mamlakat hokimiyati tepasiga qaytishga bo‘lgan irodasini sindira olmaydi. Bu haqda uning o‘g‘li Usama Mursiy ma’lum qildi, deya xabar bermoqda “RIA Novosti”.

Qohira sudi Misr sobiq prezidenti Muhammad Mursiy va uning eng yaqin safdoshlarini 20 yilga ozodlikdan mahrum etish haqida hukm chiqargandi. Ular 2012-yili Misr prezidenti saroyi oldidagi namoyishchilarni o‘ldirishga undaganlikda aybdor deb topildi.

Jazo muddatini o‘tab bo‘lganidan so‘ng, Mursiy yana besh yil davomida politsiya nazorati ostida bo‘ladi. Sud sudlanuvchilardan namoyishchilarni qasddan o‘ldirish va qotillikni amalga oshirish niyatida qurol saqlash ayblovlarini olib tashlagan.

“U oldida missiyasi bor odam ekanligini yaxshi bo‘ladi. Bu missiya – biz 2011-yil 25-yanvardagi inqilobda qo‘lga kiritgan demokratiya yo‘lidir. Biz uni albatta qaytarib olamiz. Prezident Mursiy buni juda yaxshi biladi”, - dedi sobiq prezidentning o‘g‘li Reuters’ga bergan intervyusida.

Mursiy namoyishchilarni o‘ldirishga undashdan tashqari boshqa ishlar bo‘yicha ham sudlanmoqda. Ular orasida 2011-yil yanvaridagi qamoqdan ommaviy qochish, Qatar va XAMAS harakati foydasiga josuslik qilish, shuningdek, sudyalarni haqorat qilish ishlari bor.