Yaponiya “Gruziya” geografik nomini “Jorjiya” deb rasman o‘zgartirdi

Yaponiya Gruziyani rasman “Jorjiya” (inglizcha – Georgia) deb atashni boshladi. Bu haqda Newskaz.ru xabar bermoqda.

“22-apreldan e’tiboran, Yaponiya Gruziyaning yapon tilidagi nomini “Gurujia”dan “Jojia” (Georgia)ga rasman o‘zgartirdi. Ushbu qaror Gruziya hukumati talabiga muvofiq qabul qilindi”, - deya Yaponiya elchixonasi bayonotidan iqtibos keltirmoqda “RIA Novosti”.

2009-yili Yaponiyaga tashrifi vaqtida Gruziyaning o‘sha vaqtdagi tashqi ishlar vaziri Grigola Vashadze “Gruziya” nomi rus tilidan olinganini aytib, Yaponiya tomonidan mamlakat nomining ingliz tilidagi varianti – “Jorjiya”dan foydalanishni so‘ragandi.

O‘shanda Yaponiya Gruziyaning avvalgi rasmiy nomini o‘zgartirishdan bosh tortgandi, chunki rasmiy Tokio bu vaziyatda AQSHning Jorjiya shtati bilan chalkashlik yuzaga kelishi mumkinligidan xavotir olgandi.

Biroq 2014-yilga kelib masala yana kun tartibidan o‘rin oldi, chunki hozirgi vaqtda BMTga a’zo 193 mamlakatdan 173tasi Gruziyani rasman Jorjiya deb atamoqda.