Ўзбекистон кейинги уч йил давомида «Ҳайратон – Мозори-Шариф» темир йўлидан фойдаланиш ва унга хизмат кўрсатишда давом этади. Бу ҳақда Вазирлар Маҳкамасининг Президент Ислом Каримов томонидан имзоланган 14 апрелдаги қарорида белгилаб қўйилган, дея хабар бермоқда Gazeta.uz.
Темир йўлдан фойдаланишда давом этиш тўғрисидаги «Ўзбекистон темир йўллари» ДАТК «Ўзбектемирйўлекспедиция» унитар корхонасининг Sogdiana Trans шўба корхонаси ва Афғонистон жамоат ишлари вазирлиги ўртасидаги шартнома 2015 йил мартида узайтирилган эди.
Ҳужжатга асосан, қанча юк ўтказишидан қатъий назар, темир йўлдан фойдалангани учун Ўзбекистон томони Афғонистонга бир йилда 19 миллион доллар миқдорида пул тўлайди.
Аввалги уч йил давомида (2011 йил июлида имзоланган шартномага мувофиқ) Ўзбекистон компанияси томонидан «Ҳайратон – Мозори-Шариф» йўналиши орқали 7,8 миллион тонна юк ташилди.
Афғонистоннинг Мозори-Шариф шаҳрини Ўзбекистон чегараси билан боғловчи 75 километрлик темир йўл 2010 йили очилган. Темир йўлни қуриш бўйича Афғонистон ҳукумати тендерида «Ўзбекистон темир йўллари» ютиб чиққан. Лойиҳа Осиё Taraqqiyot банкининг 165 миллион доллар ҳажмидаги гранти ҳисобидан амалга оширилган.
Ҳукумат қарорида қайд этилишича, янги келишувлар Трансафғон коридорини ривожлантириш, шунингдек, «Тошғузор – Бойсун – Қумқўрғон» темирйўли орқали транзит ташувлар ҳажмини ошириш ва Ўзбекистон корхоналарининг экспорт салоҳиятини кенгайтиришга хизмат қилади.
Изоҳ (0)