Orol dengizi muammosini hal etishning keyingi yo‘llarini belgilayotgan O‘zbekiston uni avvalgi chegaralarda qayta tiklab bo‘lmasligini yaxshi tushunadi. Bu haqda O‘zbekiston qishloq va suv xo‘jaligi vaziri birinchi o‘rinbosari Shavkat Hamroyev ma’lum qildi, deya xabar bermoqda Gazeta.uz.
“Jarayon shu qadar ilgarilab ketganki, endi uni ortga qaytarish imkoni yo‘q”, - dedi u 12-17-aprel kunlari Janubiy Koreyaning Gyondju shahrida bo‘lib o‘tayotgan VII Jahon suv forumi doirasida tashkil etilgan vazirlar davra suhbatida.
“Orolning qurishi muammosi hamda uning atrofdagi tabiiy-ekologik, ijtimoiy-gumanitar vaziyatga, genofonga, aholi salomatligiga ta’siri tobora ayanchli va tuzatib bo‘lmas tus olayotgani yildan yilga aniq ko‘rinib bormoqda”, - deya qayd etdi Shavkat Hamroyev.
“Bugun biz Orol dengizini qutqarish haqida emas, balki mintaqada istiqomat qilayotgan odamlarning hayotida tuzatib bo‘lmas o‘zgarishlarga sabab bo‘ladigan salbiy tendensiyalarni to‘xtatish haqida gapiryapmiz. Oldimizdagi vazifa – “suvni qutqarish emas”, aksincha, Orolbo‘yi reabilitatsiyasi masalalarini hal etish, aholi salomatligi va genofondini saqlash, ekotizimlarni qayta tiklash va muhofaza qilish, shu yerda va unga bevosita yaqin hududlarda yashovchi 60 milliondan ortiq aholining munosib turmushi uchun zarur sharoitlarni yaratishdan iborat”, - dedi vazir o‘rinbosari.
Hamroyev Orol inqirozini bartaraf etishda ko‘mak ko‘rsatayotgan BMT agentliklari, xalqaro moliya institutlari va donorlarga minnatdorchilik bildirdi. Ayni vaqtda uning qayd etishicha, Orol muammosi bilan bog‘liq hal etilishi kerak bo‘lgan vazifalarning keng ko‘lamda ekanligi “ushbu hududda yana katta fojealar sodir bo‘lmasligi uchun milliy, mintaqaviy va xalqaro miqyosda resurslarni birlashtirish, harakatlarni yanada samarali muvofiqlashtirishni talab qilmoqda”.
Izoh (0)