Голливуд актрисаси Гвинет Пэлтроу 29 долларга бир ҳафта яшай олмади. Бу ҳақда Newskaz.ru хабар бермоқда.
Актриса ҳафта бошида овқатни фақат махсус талонлари орқали сотиб олиб, бир ҳафта яшаб кўриш ҳақидаги қарорини эълон қилганди.
АҚШда кам таъминланган фуқароларга бериладиган бир ҳафталик озиқ-овқат талонлари қиймати 29 долларга (бир марта овқат олиш қиймати 1,38 долларга) тенг бўлиб, Пэлтроу бу пулга бир қадоқ қорамтир гуруч, қора ловия, тухум ва сабзавотлар сотиб олган.
Актриса шу йўл билан эҳтиёжманд оилалар озиқ-овқат талонлари ёрдамида қанчалик кам маҳсулот сотиб олишларини кўрсатиб бермоқчи бўлган. «Олдиндан тахмин қилганимдек, биз фақат тўрт кун бардош бера олдик ва шундан сўнг мен чидолмай, товуқ ва янги сабзавотлар сотиб олдим», - деб ёзди актриса goop.com сайтидаги блогида.
Пэлтроу «бундай кичик бюджет билан соғлом, оқсилларга бой таомлар билан озиқланиш жуда ҳам қийинлиги»ни қайд этиб, «47 миллион америкалик ҳар куни, ҳар ҳафта, ҳар йили шу муаммога дуч келиши»ни айтиб ўтган.
Маълумот учун, 1998 йили энг яхши аёл роли учун «Оскар» мукофоти билан тақдирланган актриса Гвинет Пэлтроу АҚШда озиқ-овқат дастурини молиялаштириш 2013 йилдан бери икки баробар қисқартирилганига жамоатчилик эътиборини қаратишни мақсад қилган ижтимоий акцияда иштирок этмоқда.
Изоҳ (0)