AQSHdagi Pew Research tahlil kompaniyasi e’lon qilgan tadqiqot xulosalariga ko‘ra, AQSHdagi badavlat ota-onalarning farzandlari orasida Facebook’dan voz kechish an’ana tusini olmoqda.
Sotsiologlarning ma’lumotlariga ko‘ra, o‘rtacha daromadi 100 ming dollardan yuqori bo‘lgan oilalarda o‘smirlarning 31 foizi Facebook’dan foydalanadi. Ular orasida Instagram ommabopligi bo‘yicha 2-o‘rinda turibdi – badavlat o‘smirlarning 25 foizi ushbu ijtimoiy tarmoqdan foydalanadi.
O‘z navbatida, yillik daromadi 30 ming dollardan past bo‘lgan oilalarda o‘smirlarning 51 foizi Facebook foydalanuvchisi hisoblanadi. Bunday oilalardagi o‘smirlarning 19 foizi Instagram’dan foydalanadi.
Umuman olganda, AQSHdagi o‘smirlarning 71 foizi Facebook’dan foydalandi. Undan keyingi o‘rinda 52 foizlik ko‘rsatkich bilan Instagram turibdi. Twitter va Google+’dan bir xilda – 33 foiz o‘smirlar foydalanishadi. 41 foiz o‘smir esa Snapchat foydalanuvchisi hisoblanadi.
Izoh (0)