Selfi tayoqchasi “yaponlarning eski befoyda kashfiyoti” bo‘lib chiqdi

Ilk selfi tayoqchasi smartfonlar va umuman “selfi” atamasining o‘zi paydo bo‘lishidan ancha avval – 1983-yili Yaponiyada kashf etilib, sotuvga chiqarilgan. Bu haqda “Korrespondent.net” xabar bermoqda.

Minolta firmasi 1983-yili Minolta Disc-7 fotokamerasini bozorga chiqargan – ekspertlarning fikricha, bu qurilma o‘z davridan ancha ilgarilab ketgandi.

Diskli plyonkada ishlaydigan bu fotoapparatdagi aksariyat detallar uni o‘ziga xos qilib ko‘rsatgan, xususan, uning old panelida avtoportretlar olishda maxsus qo‘llaniladigan kichik qabariq ko‘zgusi bor edi.

Biroq ilk selfi tayoqchasi hozirgidan farqli – Minolta Extender (“kengaytiruvchi”) deb nomlangan va masofadan turib suratga olish imkonini beradigan zatvor tugmasi bilan bir to‘plamda sotilgan.

E’tiborli tomoni, ushbu uskuna 1995-yili nashrdan chiqqan “Yaponlarning 101 befoyda kashfiyoti” kitobidan ham o‘rin olgan.

Qayd etish joiz, so‘nggi vaqtlarda qator muassasalarda, xususan, turli konsert zallari, muzeylarda selfi tayoqchalaridan foydalanish taqiqlanmoqda.