АҚШ Хитойнинг Жануби-Шарқий Осиёда олиб бораётган сиёсатидан хавотирда. Президент Барак Обаманинг маълум қилишича, Хитой қўшни мамлакатлар билан мавжуд ҳудудий баҳсларни куч билан ҳал қилишга уринмоқда.
ТАССнинг хабар беришича, Барак Обама бу ҳақда Ямайкага ташрифи давомида айтиб ўтган. Ямайкада Обама мамлакат раҳбарияти билан учрашди, шунингдек, маҳаллий ёшлар олдида чиқиш қилди.
«Биз Хитой ҳар доим ҳам халқаро нормалар ва одоб қоидаларига риоя этмаётгани, ҳудудий устунлигидан фойдаланаётгани ва бошқа мамлакатларни муте ҳолатга тушириш учун мушакларини кўз-кўз қилаётганидан хавотирдамиз», - деди Обама АҚШнинг Хитойга нисбатан сиёсати ҳақидаги саволга жавоб бераркан.
Жанубий Хитой ва Шарқий Хитой денгизларидаги ороллар сабаб Хитой ва унга қўшни мамлакатлар ўртасида юзага келган низолар ҳақида тўхталаркан, АҚШ президенти «бу масалаларни дипломатик йўл билан ҳал қилиш мумкинлиги»га ишонч билдирди.
«Филиппин ва Вьетнамнинг ҳудуди Хитойникидан анча кичкина эканлиги уларни силтаб ташлаш мумкинлигини англатмайди», - дея қўшимча қилди Обама.
Изоҳ (0)