Hillari Klinton bo‘lajak saylov kampaniyasi uchun saytlar va ilova-dasturlar ishlab chiqishga ma’sul bo‘lgan texnik direktor sifatida Google top-menejeri Stefani Xannonni ishga oldi. Bu haqda, o‘z manbalariga asoslanib, Washington Post xabar bermoqda.
Jamoaning Google top-menejeri qo‘l ostida bajarishi kerak bo‘lgan birinchi vazifasi – Klintonning tashviqot kampaniyasi boshlangunga qadar texnologik infratuzilmani tayyorlab qo‘yishdan iborat. Bunda, misol uchun, Klinton o‘z tarafdorlari bilan muloqot qila olishi va ulardan kampaniyani o‘tkazish uchun xayriya pullarini qabul qilish imkoniyatga ega bo‘lishi kerak.
Agar bu mish-mish tasdiqlanadigan bo‘lsa, Xannon prezident saylovi kampaniyasida texnik direktor lavozimiga tayinlangan ilk ayolga aylanishi mumkin. Hozirgi vaqtda u Google’ning fuqarolik innovatsiyalari va jamoatchilik ta’siri sohasidagi mahsulotlarini boshqarish bo‘yicha direktori hisoblanadi.
Uning Google’dagi vazifalari orasida tabiiy ofatlarga imkon qadar tezroq munosabat bildirish va saylov haqidagi axborotni (masalan, saylov uchastkalari joylashuvi va nomzodlar haqidagi ma’lumotlar) iloji boricha tezroq uzatishga qaratilgan texnologiyalarni ishlab chiqish kabilar bor.
Bungacha Xannon Google’ning kartografik servisi – Google Maps va pochta xizmati – Gmail ustida ham ish olib borgan. Shuningdek, u Facebook, Cisco va Intel kabi kompaniyalarda ham ishlashga ulgurgan.
Hillari Klinton 2016-yilgi AQSH prezidenti saylovida Demokratik partiyadan asosiy nomzod bo‘lishi kutilmoqda, biroq uning o‘zi davlat rahbari o‘rni uchun kurash olib borishi haqida rasman bayonet berganicha yo‘q.
Izoh (0)