Ҳиллари Клинтон бўлажак сайлов кампанияси учун сайтлар ва илова-дастурлар ишлаб чиқишга маъсул бўлган техник директор сифатида Google топ-менежери Стефани Ханнонни ишга олди. Бу ҳақда, ўз манбаларига асосланиб, Washington Post хабар бермоқда.
Жамоанинг Google топ-менежери қўл остида бажариши керак бўлган биринчи вазифаси – Клинтоннинг ташвиқот кампанияси бошлангунга қадар технологик инфратузилмани тайёрлаб қўйишдан иборат. Бунда, мисол учун, Клинтон ўз тарафдорлари билан мулоқот қила олиши ва улардан кампанияни ўтказиш учун хайрия пулларини қабул қилиш имкониятга эга бўлиши керак.
Агар бу миш-миш тасдиқланадиган бўлса, Ханнон президент сайлови кампаниясида техник директор лавозимига тайинланган илк аёлга айланиши мумкин. Ҳозирги вақтда у Google’нинг фуқаролик инновациялари ва жамоатчилик таъсири соҳасидаги маҳсулотларини бошқариш бўйича директори ҳисобланади.
Унинг Google’даги вазифалари орасида табиий офатларга имкон қадар тезроқ муносабат билдириш ва сайлов ҳақидаги ахборотни (масалан, сайлов участкалари жойлашуви ва номзодлар ҳақидаги маълумотлар) иложи борича тезроқ узатишга қаратилган технологияларни ишлаб чиқиш кабилар бор.
Бунгача Ханнон Google’нинг картографик сервиси – Google Maps ва почта хизмати – Gmail устида ҳам иш олиб борган. Шунингдек, у Facebook, Cisco ва Intel каби компанияларда ҳам ишлашга улгурган.
Ҳиллари Клинтон 2016 йилги АҚШ президенти сайловида Демократик партиядан асосий номзод бўлиши кутилмоқда, бироқ унинг ўзи давлат раҳбари ўрни учун кураш олиб бориши ҳақида расман баёнет берганича йўқ.
Изоҳ (0)