Fransiyalik juftlik 2013-yilda ruminiyalik oiladan 8 ming yevro va eski BMW evaziga go‘dak sotib olganligi uchun, 8-aprel kuni, Marsel sudida hozir bo‘ldi. Ularga 30 ming yevro miqdoridagi jarima yoki 2 yillik qamoq jazosi qo‘llanishi mumkin. Bu haqda BFM TV telekanali xabar berdi.
28 yoshli Mayk va 27 yoshli Karmen Gorganlar bola uchun pul to‘laganliklarini tan olganiga qaramasdan o‘zlarini aybdor emas deb hisoblamoqda. Karmen: “Biz qandaydir yomon ish qildik deb o‘ylamaymiz. Biz bolani muhtojlikdan qutqardik, biz bo‘lmaganimizda u o‘lishi mumkin edi”, – deya o‘z fikrini ma’lum qildi.
Gorganlar oilasidan tashqari Marselda odam savdosida ayblanib ruminiyalik to‘rt opa-singil ham sudlanmoqda, deyiladi The Daily Mail bergan xabarda. Surishtiruv-qidiruv natijalariga ko‘ra aynan ular bolani Karmen va Maykka sotgan bo‘lishi mumkin. Gumondorlar esa, bolaning sovg‘a qilinganligini aytib, ayblarini inkor etmoqda. Aybdorligi isbotlangan taqdirda ularga o‘n yillik qamoq jazosi qo‘llaniladi.
Izoh (0)