“Daryo” Amerikada: Plantronics’ning Kremniy vodiysidagi ofisiga tashrif

Shunday qilib, Plantronics’ning Meksikadagi zavodini tomosha qilib, kechga yaqin ortga, AQShga qaytdik.

Qaytishda chegaradan piyoda o‘tdik. Meksika tomonidan hech qanday tekshiruv o‘tkazilmas, faqat AQSh chegarachilari hujjatlarni tekshirar ekan.

Aytishlariga qaraganda, bizga omad kulib boqqan emish: odatda chegarada odam ko‘p bo‘lar, yarim soat—bir soat davomida navbat kutish odatiy hol ekanligi ta’kidlandi.

Ishqilib, chegara — bu ancha eski va uncha yoqimli bo‘lmagan katta zal bo‘lib, unda taxminan 6 chegarachi o‘tiribdi. Har birining oldiga navbatma-navbat o‘tilyapti. Chegaradan o‘tish yarim daqiqa vaqt oldi — chegarachi (soqolli, shlyapali, kiyimlari g‘ijim) amaki pasportimga bir qiyo boqdi va AQShga kirishga ruxsat berdi.

Nariroqda mikroavtobusimiz kutib turardi. Unga o‘tirdik-da, San-Diyego aeroportiga yo‘lga tushdik. Keyingi manzil: Plantronics’ning Santa-Kruzdagi bosh ofisi.

San-Diyego va Santa-Kruz shaharlari orasidagi masofa kattaligi bois (deyarli 800 km), avval samolyotda San-Xose shahriga borib, u yerdan boshqa mashinada Santa-Kruzga boradigan bo‘ldik.

San-Diyegodan San-Xose shahriga Southwest Airlines aviakompaniyasi samolyotida uchdik. Southwest arzon narxlarda xizmat ko‘rsatadigan aviakompaniya bo‘lib, kuniga 3400 ta reys amalga oshirar ekan. Eng qizig‘i, aviakompaniya samolyotlarida joylar oldindan taqsimlanmas ekan: xuddi avtobusdagidek, kim birinchi chiqsa, shu yaxshi joylarni tanlab oladi.

Yaxshi joylar talash bo‘lmasligi uchun biletlar guruhlarga bo‘lib taqsimlanar ekan. Ya’ni, aeroportga vaqtli kelsangiz, siz A guruhga kirasiz va samolyotga birinchilardan bo‘lib o‘tirasiz. Kechroq borsangiz, unda C guruhga qo‘shilasiz hamda A va B guruhda kirgan yo‘lovchilar egallamagan joylarga o‘tirishingiz mumkin bo‘ladi.

Biz sal kech borgan ekanmiz, C guruhiga tushdik va eng noqulay joylarda o‘tirib ketdik :-( Ammo, uni-buni qo‘yavering, samolyot bortida Wi-Fi bor ekan: 8 dollarga parvoz davomida mazza qilib “Daryo”ni o‘qib ketdim :-)

San-Xose va Santa-Kruz shaharlari o‘rtasida joylashgan Skotts-Xill shahridagi mehmonxonada tunab, ertasi kuni, 18-aprelda Plantronics’ning bosh ofisiga keldik. Kompaniya ofisi Santa-Kruzning juda tinch, osoyishta qismida joylashgan bo‘lib, u hududda yana juda ko‘p turli kompaniyalar faoliyat yuritar ekan.

Santa-Kruz geografik jihatdan Kremniy vodiysida joylashmagan bo‘lsa-da, shaharda ko‘plab yuqori texnologiyalar sohasida faoliyat ko‘rsatadigan kompaniyalar bo‘lgani uchun, Vodiydagi shaharlar qatoriga kiritilar ekan.

Plantronics bosh ofisiga kiraverishda kompaniya g‘ururi — Oyga qadam qo‘ygan birinchi inson (Nil Armstrong) kompaniya garniturasidan foydalangani aks etgan katta surat osib qo‘yilgan.

Ofis bo‘ylab ekskursiyani boshlashdan avval kompaniya mutasaddilari, kompaniya tarixi va kelajagi bilan tanishdik. Ekskursiyani esa Plantronics qurilmalari dizayni ishlab chiqariladigan laboratoriyadan boshladik.

Dizayn laboratoriyasi boshlig‘i Darrin Kaddes avval BMW kompaniyasida dizayner bo‘lib ishlagan va mototsikllarga juda qiziqar ekan. Ammo, mototsiklida avariyaga uchrab, oyoqlari ishlamay qolgan, aravachada harakat qilarkan. O‘zining aytishicha, aravachaga bog‘lanib qolib, ikkala qo‘li aravachani g‘ildiratish bilan band bo‘lgan paytda telefon orqali so‘zlash uchun Plantronics garnituralaridan foydalana boshlagan. Ulardan foydalanishni qulaylashtirish, doim suhbatda bo‘ladigan biznesmenlar, qo‘li doim band kishilar, haydovchilar va o‘ziga o‘xshagan nogironlar hayotini yengillashtirish uchun u Plantronics kompaniyasiga ishga o‘tgan ekan.

Uning ishini qanchalik sevishi, har bir savolga juda berilib, jon-jahdi bilan javob berishi, qurilmalar haqida muhabbat bilan gapirib berishi mening havasimni keltirdi. Hamma sohada shunday jonkuyar xodimlar bo‘lganida edi...

Dizayn laboratoriyasida yangi qurilmalar dizayni, eski qurilmalarni yaxshilash ustida ish olib boriladi. U yerda avval ishlab chiqarilib, ammo sotuvga chiqmagan qurilmalar ko‘rgazmasi ham bor. Bundan tashqari, taxminan 50 xil quloqlarning maketlari bor: yangi qurilmalarni o‘sha “quloq”larga “taqib” ko‘rib, tekshirilar ekan.

Ofis open space – bo‘laklarga bo‘lingan katta zallardan iborat. Bir zalda 10 dan 50 kishigacha ishlashi mumkin. Buning oqibatida yuzaga kelishi mumkin shovqinning oldini olish uchun zallarda sun’iy sharsharalar o‘rnatilgan. Sharsharalarning biridangina rosmana suv shovqini eshitiladi. Bu sharsharada suv shoviqini yozib olinib, boshqa shunday sharshalarga ulangan. Qiziq-a? :-)

Ba’zi zallarga maxsus chiroqlar o‘rnatilib, ular shiftlarni mayin ranglar bilan yoritib turadi. Bu qulay ish muhitini, yaxshi kayfiyatni yaratishga hissa qo‘shishini aytishdi.

Ofisda katta zallardan tashqari kichik xonalar ham bo‘lib, ularda yig‘ilishlar, muzokaralar o‘tkaziladi. Xonalarda telefon, simsiz internet, videokonferensiyalar uchun televizorlar o‘rnatilgan. Xonalar fazo mavzusida nomlangan: biz Nil Armstrong, Bazz Oldrin, Xyuston, Qo‘nish (Splashdown), Ko‘tarilish (Take off) xonalarini ko‘rdik.

Xodimlarning qorni ochqab qolsa uncha yaxshi ishlamaydi, shundaymi? Shu sababli xodimlar uchun oshxona mavjud bo‘lib, u yerda istalgan payt bepul ovqatlanish mumkin ekan. Plantronics mutasaddilari bizning ham ahvolimizdan tez-tez xabar olib turishdi, och qolmadik ;-)

Ofisning o‘z hovlisi bo‘lib, u yerda kichik ko‘lcha va sharshara mavjud, atrofiga esa stol va stullar qo‘yilgan. Havo yaxshi bo‘lganda — Kaliforniyada esa deyarli doim havo ochiq — hovlida o‘tirib ham ishlash mumkin, toza havo va suvning shildirashidan bahra olgan holda.

Xonalarni aylanib yursak, Bluetooth — simsiz axborot uzatish texnologiyasini yaratgan kishi — Yaap Xaartsenni uchratib qoldik. Bu kishi Plantronics uchun juda muhim mutaxassis, chunki kompaniyaning deyarli barcha qurilmalari Bluetooth texnologiyasi yordamida ishlaydi.

Esingizdami, kompaniyaning Meksikada joylayshgan zavodidagi aks-sadosiz xona haqida yozgan edim. Bosh ofisda ham shunday kamera bor ekan (faqat kichikrog‘i). Bundan tashqari, bu yerda elektromagnit to‘lqinlar o‘tmaydigan kamerani ham ko‘rdik. Ya’ni, u xonada telefonning antennasi ushlamaydi, televizor ko‘rsatmaydi, radio esa kuylamaydi. Bu yerda Plantronics garnituralariga elektromagnit to‘lqinlarning ta’siri o‘rganiladi.

Amerikaning bir tomoni hayron qoldirdi. Masalan, kompaniya bosh dizayneri toza amerikalik, boshqa top-menejeri fransuz, prototiplar laboratoriyasi rahbari esa shveysariyalik nemis. Bundan tashqari biz qora tanlilarni, lotin amerikaliklarni ko‘p uchratdik. Ular barchasi o‘ziga xos sheva bilan gapiradi (asli fransuz bo‘lgan xodim qancha urinsa ham “r” tovushini ayta olmadi) va bu odatiy hol hisoblanadi, hech kim bundan ajablanmaydi, taajjublanmaydi.

Ekskursiyamizning ikkinchi kunida kompaniya prezidenti Ken Kannappan bilan uchrashdik. U tushlik ustida kompaniya kelajagi haqida so‘zlab berdi. Juda ochiq, og‘ir-bosiq kishi ekan. Ko‘rinishi juda sodda bo‘lgan bu insonning deyarli milliard dollarlik mahsulot chiqaruvchi kompaniya rahbari ekanligiga ishonish qiyin.

Plantronics bosh ofisiga tashrifimizning ikkinchi (va so‘nggi kunida) top-menejerlar kompaniyaning korporativ segment uchun mo‘ljallangan mahsulotlari va yangi taqiladigan qurilmalar olami haqida so‘zlab berdi.

Masalan, Plantronics Voyager garniturasida bir qancha sensorlar o‘rnatilgan bo‘lib, telefoningiz jiringlayotgan paytda uni qulog‘ingizga taqsangiz, u go‘shakni avtomatik tarzda ko‘taradi. Kompaniyaning yangi, hali bozorga chiqishga ulgurmagan prototiplarida boshingiz qaysi tomonga qarab turgani, qanday tezlikda harakatlanayotganingiz, tanangiz harorati, dengiz sathidan qanday balandlikda joylashganingiz haqida ham ma’lumotga ega bo‘lar ekan.

Kompaniya nafaqat Bluetooth-garnituralar, balki geymerlar uchun ham quloqchinlar ishlab chiqaradi. Bu haqda yoshlari ellikka borib qolgan, o‘zini ashaddiy geymer hisoblaydigan Plantronics xodimi so‘zlab berdi. Yosh geymerlarni brend bilan tanishtirib, keyinchalik ularni kompaniya garnituralaridan foydalanishini ta’minlash uchun bunday qurilmalar ishlab chiqarilishini aytishdi.

Yangi mahsulotlarni ishlab chiqish haqida so‘z borganida qurilmalar prototiplarini yaratish to‘g‘risida so‘z ketdi. Ushbu jarayon bilan to‘liq tanishtirish maqsadida bizni yangi mahsulotlar laboratoriyasiga taklif qilishdi.

Laboratoriyada turli qurilma va stanoklar o‘rnatilgan bo‘lib, ular qatorida 3D-printerlar ham bor ekan. Bunday printer yordamida yangi qurilma korpusini qisqa muddatda yaratish mumkin.

Ikki kun davomida Plantronics kompaniyasi haqida batafsil ma’lumot olib, uyga otlandik. Buning uchun yana samolyotga o‘tirib, Los-Anjelesga yo‘l oldik. U yerdan kimlar Moskvaga, kimlar Baku, kimlar Olma-ota va Minskka, men esa Seul (Janubiy Koreya)ga yo‘l oldim.

Xayr, Amerika!

Aytgancha…

Telefon: (+998-71) 200-33-55 (qo‘shimcha 201), (+998-94) 634-09-99. Faks: (+998-71) 200-33-77

Veb-sayt: http://followmars.com