«Дарё» Америкада: Plantronics’нинг Кремний водийсидаги офисига ташриф

Шундай қилиб, Plantronics’нинг Мексикадаги заводини томоша қилиб, кечга яқин ортга, АҚШга қайтдик.

Қайтишда чегарадан пиёда ўтдик. Мексика томонидан ҳеч қандай текширув ўтказилмас, фақат АҚШ чегарачилари ҳужжатларни текширар экан.

Айтишларига қараганда, бизга омад кулиб боққан эмиш: одатда чегарада одам кўп бўлар, ярим соат—бир соат давомида навбат кутиш одатий ҳол эканлиги таъкидланди.

Ишқилиб, чегара — бу анча эски ва унча ёқимли бўлмаган катта зал бўлиб, унда тахминан 6 чегарачи ўтирибди. Ҳар бирининг олдига навбатма-навбат ўтиляпти. Чегарадан ўтиш ярим дақиқа вақт олди — чегарачи (соқолли, шляпали, кийимлари ғижим) амаки паспортимга бир қиё боқди ва АҚШга киришга рухсат берди.

Нарироқда микроавтобусимиз кутиб турарди. Унга ўтирдик-да, Сан-Диего аэропортига йўлга тушдик. Кейинги манзил: Plantronics’нинг Санта-Круздаги бош офиси.

Сан-Диего ва Санта-Круз шаҳарлари орасидаги масофа катталиги боис (деярли 800 км), аввал самолётда Сан-Хосе шаҳрига бориб, у ердан бошқа машинада Санта-Крузга борадиган бўлдик.

Сан-Диегодан Сан-Хосе шаҳрига Southwest Airlines авиакомпанияси самолётида учдик. Southwest арзон нархларда хизмат кўрсатадиган авиакомпания бўлиб, кунига 3400 та рейс амалга оширар экан. Энг қизиғи, авиакомпания самолётларида жойлар олдиндан тақсимланмас экан: худди автобусдагидек, ким биринчи чиқса, шу яхши жойларни танлаб олади.

Яхши жойлар талаш бўлмаслиги учун билетлар гуруҳларга бўлиб тақсимланар экан. Яъни, аэропортга вақтли келсангиз, сиз А гуруҳга кирасиз ва самолётга биринчилардан бўлиб ўтирасиз. Кечроқ борсангиз, унда C гуруҳга қўшиласиз ҳамда А ва B гуруҳда кирган йўловчилар эгалламаган жойларга ўтиришингиз мумкин бўлади.

Биз сал кеч борган эканмиз, C гуруҳига тушдик ва энг ноқулай жойларда ўтириб кетдик :-( Аммо, уни-буни қўяверинг, самолёт бортида Wi-Fi бор экан: 8 долларга парвоз давомида мазза қилиб «Дарё»ни ўқиб кетдим :-)

Сан-Хосе ва Санта-Круз шаҳарлари ўртасида жойлашган Скоттс-Хилл шаҳридаги меҳмонхонада тунаб, эртаси куни, 18 апрелда Plantronics’нинг бош офисига келдик. Компания офиси Санта-Крузнинг жуда тинч, осойишта қисмида жойлашган бўлиб, у ҳудудда яна жуда кўп турли компаниялар фаолият юритар экан.

Санта-Круз географик жиҳатдан Кремний водийсида жойлашмаган бўлса-да, шаҳарда кўплаб юқори технологиялар соҳасида фаолият кўрсатадиган компаниялар бўлгани учун, Водийдаги шаҳарлар қаторига киритилар экан.

Plantronics бош офисига кираверишда компания ғурури — Ойга қадам қўйган биринчи инсон (Нил Армстронг) компания гарнитурасидан фойдалангани акс этган катта сурат осиб қўйилган.

Офис бўйлаб экскурсияни бошлашдан аввал компания мутасаддилари, компания тарихи ва келажаги билан танишдик. Экскурсияни эса Plantronics қурилмалари дизайни ишлаб чиқариладиган лабораториядан бошладик.

Дизайн лабораторияси бошлиғи Даррин Каддес аввал BMW компаниясида дизайнер бўлиб ишлаган ва мотоциклларга жуда қизиқар экан. Аммо, мотоциклида аварияга учраб, оёқлари ишламай қолган, аравачада ҳаракат қиларкан. Ўзининг айтишича, аравачага боғланиб қолиб, иккала қўли аравачани ғилдиратиш билан банд бўлган пайтда телефон орқали сўзлаш учун Plantronics гарнитураларидан фойдалана бошлаган. Улардан фойдаланишни қулайлаштириш, доим суҳбатда бўладиган бизнесменлар, қўли доим банд кишилар, ҳайдовчилар ва ўзига ўхшаган ногиронлар ҳаётини енгиллаштириш учун у Plantronics компаниясига ишга ўтган экан.

Унинг ишини қанчалик севиши, ҳар бир саволга жуда берилиб, жон-жаҳди билан жавоб бериши, қурилмалар ҳақида муҳаббат билан гапириб бериши менинг ҳавасимни келтирди. Ҳамма соҳада шундай жонкуяр ходимлар бўлганида эди...

Дизайн лабораториясида янги қурилмалар дизайни, эски қурилмаларни яхшилаш устида иш олиб борилади. У ерда аввал ишлаб чиқарилиб, аммо сотувга чиқмаган қурилмалар кўргазмаси ҳам бор. Бундан ташқари, тахминан 50 хил қулоқларнинг макетлари бор: янги қурилмаларни ўша «қулоқ»ларга «тақиб» кўриб, текширилар экан.

Офис open space – бўлакларга бўлинган катта заллардан иборат. Бир залда 10 дан 50 кишигача ишлаши мумкин. Бунинг оқибатида юзага келиши мумкин шовқиннинг олдини олиш учун залларда сунъий шаршаралар ўрнатилган. Шаршараларнинг биридангина росмана сув шовқини эшитилади. Бу шаршарада сув шовиқини ёзиб олиниб, бошқа шундай шаршаларга уланган. Қизиқ-а? :-)

Баъзи залларга махсус чироқлар ўрнатилиб, улар шифтларни майин ранглар билан ёритиб туради. Бу қулай иш муҳитини, яхши кайфиятни яратишга ҳисса қўшишини айтишди.

Офисда катта заллардан ташқари кичик хоналар ҳам бўлиб, уларда йиғилишлар, музокаралар ўтказилади. Хоналарда телефон, симсиз интернет, видеоконференциялар учун телевизорлар ўрнатилган. Хоналар фазо мавзусида номланган: биз Нил Армстронг, Базз Олдрин, Хьюстон, Қўниш (Splashdown), Кўтарилиш (Take off) хоналарини кўрдик.

Ходимларнинг қорни очқаб қолса унча яхши ишламайди, шундайми? Шу сабабли ходимлар учун ошхона мавжуд бўлиб, у ерда исталган пайт бепул овқатланиш мумкин экан. Plantronics мутасаддилари бизнинг ҳам аҳволимиздан тез-тез хабар олиб туришди, оч қолмадик ;-)

Офиснинг ўз ҳовлиси бўлиб, у ерда кичик кўлча ва шаршара мавжуд, атрофига эса стол ва стуллар қўйилган. Ҳаво яхши бўлганда — Калифорнияда эса деярли доим ҳаво очиқ — ҳовлида ўтириб ҳам ишлаш мумкин, тоза ҳаво ва сувнинг шилдирашидан баҳра олган ҳолда.

Хоналарни айланиб юрсак, Bluetooth — симсиз ахборот узатиш технологиясини яратган киши — Яап Хаарценни учратиб қолдик. Бу киши Plantronics учун жуда муҳим мутахассис, чунки компаниянинг деярли барча қурилмалари Bluetooth технологияси ёрдамида ишлайди.

Эсингиздами, компаниянинг Мексикада жойлайшган заводидаги акс-садосиз хона ҳақида ёзган эдим. Бош офисда ҳам шундай камера бор экан (фақат кичикроғи). Бундан ташқари, бу ерда электромагнит тўлқинлар ўтмайдиган камерани ҳам кўрдик. Яъни, у хонада телефоннинг антеннаси ушламайди, телевизор кўрсатмайди, радио эса куйламайди. Бу ерда Plantronics гарнитураларига электромагнит тўлқинларнинг таъсири ўрганилади.

Американинг бир томони ҳайрон қолдирди. Масалан, компания бош дизайнери тоза америкалик, бошқа топ-менежери француз, прототиплар лабораторияси раҳбари эса швейцариялик немис. Бундан ташқари биз қора танлиларни, лотин америкаликларни кўп учратдик. Улар барчаси ўзига хос шева билан гапиради (асли француз бўлган ходим қанча уринса ҳам «р» товушини айта олмади) ва бу одатий ҳол ҳисобланади, ҳеч ким бундан ажабланмайди, таажжубланмайди.

Экскурсиямизнинг иккинчи кунида компания президенти Кен Каннаппан билан учрашдик. У тушлик устида компания келажаги ҳақида сўзлаб берди. Жуда очиқ, оғир-босиқ киши экан. Кўриниши жуда содда бўлган бу инсоннинг деярли миллиард долларлик маҳсулот чиқарувчи компания раҳбари эканлигига ишониш қийин.

Plantronics бош офисига ташрифимизнинг иккинчи (ва сўнгги кунида) топ-менежерлар компаниянинг корпоратив сегмент учун мўлжалланган маҳсулотлари ва янги тақиладиган қурилмалар олами ҳақида сўзлаб берди.

Масалан, Plantronics Voyager гарнитурасида бир қанча сенсорлар ўрнатилган бўлиб, телефонингиз жиринглаётган пайтда уни қулоғингизга тақсангиз, у гўшакни автоматик тарзда кўтаради. Компаниянинг янги, ҳали бозорга чиқишга улгурмаган прототипларида бошингиз қайси томонга қараб тургани, қандай тезликда ҳаракатланаётганингиз, танангиз ҳарорати, денгиз сатҳидан қандай баландликда жойлашганингиз ҳақида ҳам маълумотга эга бўлар экан.

Компания нафақат Bluetooth-гарнитуралар, балки геймерлар учун ҳам қулоқчинлар ишлаб чиқаради. Бу ҳақда ёшлари элликка бориб қолган, ўзини ашаддий геймер ҳисоблайдиган Plantronics ходими сўзлаб берди. Ёш геймерларни бренд билан таништириб, кейинчалик уларни компания гарнитураларидан фойдаланишини таъминлаш учун бундай қурилмалар ишлаб чиқарилишини айтишди.

Янги маҳсулотларни ишлаб чиқиш ҳақида сўз борганида қурилмалар прототипларини яратиш тўғрисида сўз кетди. Ушбу жараён билан тўлиқ таништириш мақсадида бизни янги маҳсулотлар лабораториясига таклиф қилишди.

Лабораторияда турли қурилма ва станоклар ўрнатилган бўлиб, улар қаторида 3D-принтерлар ҳам бор экан. Бундай принтер ёрдамида янги қурилма корпусини қисқа муддатда яратиш мумкин.

Икки кун давомида Plantronics компанияси ҳақида батафсил маълумот олиб, уйга отландик. Бунинг учун яна самолётга ўтириб, Лос-Анжелесга йўл олдик. У ердан кимлар Москвага, кимлар Баку, кимлар Олма-ота ва Минскка, мен эса Сеул (Жанубий Корея)га йўл олдим.

Хайр, Америка!

Айтганча…

Телефон: (+998-71) 200-33-55 (қўшимча 201), (+998-94) 634-09-99. Факс: (+998-71) 200-33-77

Веб-сайт: http://followmars.com