Bahorgi umra ziyoratida jami 5350 nafar o‘zbekistonliklarning Toshkent – Jidda – Toshkent yo‘nalishi bo‘yicha 25 ta charter reysida safarlari tashkil etildi, deya xabar bermoqda Vazirlar Mahkamasi huzuridagi Din ishlari bo‘yicha qo‘mita matbuot xizmati.
Ziyoratchilarga mavsum davomida o‘zbekistonlik 8 nafar ishchi guruhi, 107 nafar guruh rahbari (ellikboshi), 27 nafar shifokor va 4 nafar oshpaz xizmat ko‘rsatdi. Ziyoratchilarga safardan oldin davlat ramzlari tushirilgan maxsus kiyim (kamzul) va sumkalar, “Umra” qo‘llanmasi va videotasmalar taqdim etildi.
Barcha ziyoratchilar markazlashgan tibbiy punktlarida meningit va grippga qarshi zardob bilan emlangan. Saudiya Arabistonida havo haroratining yuqori darajada bo‘lishi kuzatilayotganligini inobatga olib, shifokorlar guruhi tomonidan ziyoratchilarning salomatligini saqlash maqsadida eslatma-tavsiyalar ishlab chiqilib, tegishli tushuntirish ishlari olib borildi.
O‘zbekistonlik ziyoratchilar istiqomat qilishlari uchun Madina shahrida “Masjidi nabaviy”dan 150 metr masofada joylashgan to‘rt yulduzli “Feyruz al-Xayr” mehmonxonasi, Makka shahrida esa “Xaram masjidi”dan 2000 metr uzoqlikdagi “Sovfat al-Miya’d” mehmonxonasi xizmat ko‘rsatdi.
Joriy yilning 6-iyulidan 20-iyuliga qadar Umra safarining ikkinchi bosqichi tashkil etiladi. Unda 670 nafar fuqarolarni Ramazon oyida ziyoratlarini tashkil etish rejalashtirilmoqda.
Izoh (0)