O‘zbekiston Vazirlar Mahkamasi qarori bilan Toshkentdagi Turin politexnika universitetiga 2015—2016-o‘quv yili uchun qabul kvotasi belgilandi, deya xabar bermoqda “Gazeta.uz”.
Yangi o‘quv yilida bakalavriatda ta’lim olish uchun to‘lov-shartnoma asosida 250 kishi qabul qilinadi, bu o‘tgan yildagidan 75 kishiga ko‘p demakdir.
“Mashinasozlik texnologiyasi” mutaxassisligi bo‘yicha qabul kvotasi 100 dan 150 kishiga, “Axborot texnologiyalari va sanoatda BAT” yo‘nalishida 25 dan 50 kishigacha ko‘paytirildi. “Energetika” va “Sanoat-fuqarolik qurilishi va me’morchilik” mutaxassisliklariga o‘tgan yilgidek 25 kishidan qabul qilinadi.
“Mexatronika” yo‘nalishi bo‘yicha magistraturaga esa to‘lov-shartnoma asosida 25 nafar talabani qabul qilish rejalashtirilmoqda.
Ma’lumot o‘rnida: Toshkentdagi Turin politexnika universiteti 2009-yilning 27-aprelida O‘zbekiston Prezidentining qarori bilan tashkil qilingan.
Izoh (0)