Shimoliy Atlantika alyansi Rossiyadan “harbiy mashg‘ulotlar o‘tkazishda ochiq bo‘lishi”ni kutmoqda, deya xabar bermoqda “TASS” alyans matbuot xizmati vakiliga tayanib.
Rossiyaning Arktikadagi qo‘shinlari harbiy tayyorgarligini tekshirish ishlarini izohlar ekan, vakil bu NATOni jiddiy xavotirga solishi va “Yevropada beqarorlik yuzaga kelishiga sabab bo‘lishi”ni aytdi.
“Rossiya so‘nggi ikki yil ichida o‘ndan ziyod kutilmagan mashg‘ulotlar o‘tkazdi. NATO sovuq urush tugaganidan buyon tasodifiy manyovrlar olib borgani yo‘q. NATO o‘z mashg‘ulotlari bo‘yicha ochiq yo‘l tutadi, biz Rossiyadan ham shuni umid qilib qolamiz”, — deyishdi alyans bosh qarorgohidagilar.
Eslatib o‘tamiz, avvalroq Rossiya prezidenti Vladimir Putin G‘arbiy harbiy okrugning Shimoliy floti va boshqa alohida birlashmalari hamda Harbiy-desant qo‘shinlarini to‘liq jangovar shaylik holatiga keltirish haqida buyruq bergan edi.
Avvalroq kutilmagan tekshiruvga 38 ming nafar harbiy xizmatchilar, 3,36 ming dona harbiy texnika, 41 ta kema, 15 ta suvosti kemasi, 110 ta samolyot va vertolyotlar jalb etilishi aytildi, biroq 18-mart, chorshanba kuni ularning soni ikki marta oshgani ma’lum bo‘ldi — endi manyovrlarda 76 ming kishi, 100 ga yaqin kemalar, suvosti kemalari, 200 dan ziyod samolyot va vertolyotlar qatnashadi.
Tekshiruvdan asosiy maqsad Shimoliy flotning Rossiyaning Arktikadagi harbiy xavfsizligini ta’minlash imkoniyatini baholashdan iborat.
Izoh (0)