Шимолий Атлантика альянси Россиядан «ҳарбий машғулотлар ўтказишда очиқ бўлиши»ни кутмоқда, дея хабар бермоқда ТАСС альянс матбуот хизмати вакилига таяниб.
Россиянинг Арктикадаги қўшинлари ҳарбий тайёргарлигини текшириш ишларини изоҳлар экан, вакил бу НАТОни жиддий хавотирга солиши ва «Европада беқарорлик юзага келишига сабаб бўлиши»ни айтди.
«Россия сўнгги икки йил ичида ўндан зиёд кутилмаган машғулотлар ўтказди. НАТО совуқ уруш тугаганидан буён тасодифий манёврлар олиб боргани йўқ. НАТО ўз машғулотлари бўйича очиқ йўл тутади, биз Россиядан ҳам шуни умид қилиб қоламиз», — дейишди альянс бош қароргоҳидагилар.
Эслатиб ўтамиз, аввалроқ Россия президенти Владимир Путин Ғарбий ҳарбий округнинг Шимолий флоти ва бошқа алоҳида бирлашмалари ҳамда Ҳарбий-десант қўшинларини тўлиқ жанговар шайлик ҳолатига келтириш ҳақида буйруқ берган эди.
Аввалроқ кутилмаган текширувга 38 минг нафар ҳарбий хизматчилар, 3,36 минг дона ҳарбий техника, 41 та кема, 15 та сувости кемаси, 110 та самолёт ва вертолётлар жалб этилиши айтилди, бироқ 18 март, чоршанба куни уларнинг сони икки марта ошгани маълум бўлди — энди манёврларда 76 минг киши, 100 га яқин кемалар, сувости кемалари, 200 дан зиёд самолёт ва вертолётлар қатнашади.
Текширувдан асосий мақсад Шимолий флотнинг Россиянинг Арктикадаги ҳарбий хавфсизлигини таъминлаш имкониятини баҳолашдан иборат.
Изоҳ (0)