Avval xabar berganimizdek, 1-mart kuni Samsung Mobile World Congress anjumani doirasida ikkita flagman smartfoni — Galaxy S6 va Galaxy S6 Edge’ni taqdim etdi.
TJournal yozishicha, qurilmalar ba’zi rakurslardan iPhone 6 va boshqa kompaniyalar smartfonlariga juda o‘xshash, buni S6 va S6 Edge’ning ilk suratlariyoq tasdiqladi. Nashr Samsung xodimlari yangi smartfonlarni yaratishda nimalardan ilhomlanganini aniqlashga qaror qildi.
Galaxy S6’ning pastki qismi iPhone 6, chap yonbosh tomoni Sony Xperia Z2, o‘ng yoni esa iPhone 6, orqa qopqog‘i iPhone 4 va Galaxy S5 qo‘shilmasiga, shuningdek old qismi avvalgi Samsung smartfonlariga juda o‘xshash ekanligi aniqlandi.
Galaxy S3 va Galaxy S4 chiqqan vaqtlarda OAVlar Samsung’ning nihoyat Apple’dan nusxa olishni bas qilib, “o‘zini topgani”ni yozgan edi. Biroq 2014-yildagi muvaffaqiyatsizliklar Koreya kompaniyasini yana oldingi sxemaga qaytishga undadi.
“Galaxy S6 va Galaxy S6 Edge haqiqatda ‘Samsung ayfonlari’dir. Ko‘pchilik foydalanuvchilar uchun ular va Apple mahsulotlari o‘rtasidagi eng sezilarli farq faqatgina ularga o‘rnatilgan tizimlardan iborat bo‘ladi”, — deya xulosa qildi nashr.
Izoh (0)