Аввал хабар берганимиздек, 1 март куни Samsung Mobile World Congress анжумани доирасида иккита флагман смартфони — Galaxy S6 ва Galaxy S6 Edge’ни тақдим этди.
TJournal ёзишича, қурилмалар баъзи ракурслардан iPhone 6 ва бошқа компаниялар смартфонларига жуда ўхшаш, буни S6 ва S6 Edge’нинг илк суратлариёқ тасдиқлади. Нашр Samsung ходимлари янги смартфонларни яратишда нималардан илҳомланганини аниқлашга қарор қилди.
Galaxy S6’нинг пастки қисми iPhone 6, чап ёнбош томони Sony Xperia Z2, ўнг ёни эса iPhone 6, орқа қопқоғи iPhone 4 ва Galaxy S5 қўшилмасига, шунингдек олд қисми аввалги Samsung смартфонларига жуда ўхшаш эканлиги аниқланди.
Galaxy S3 ва Galaxy S4 чиққан вақтларда ОАВлар Samsung’нинг ниҳоят Apple’дан нусха олишни бас қилиб, «ўзини топгани»ни ёзган эди. Бироқ 2014 йилдаги муваффақиятсизликлар Корея компаниясини яна олдинги схемага қайтишга ундади.
«Galaxy S6 ва Galaxy S6 Edge ҳақиқатда ‘Samsung айфонлари’дир. Кўпчилик фойдаланувчилар учун улар ва Apple маҳсулотлари ўртасидаги энг сезиларли фарқ фақатгина уларга ўрнатилган тизимлардан иборат бўлади», — дея хулоса қилди нашр.
Изоҳ (0)