Prezidentning 19-maydagi farmoni bilan O‘zbekistonda ayrim shifokorlarning oylik lavozim maoshlari 20 foizga oshiriladi.
“Respublikada sog‘liqni saqlash tizimini va aholiga tibbiy xizmat ko‘rsatish tamoyillarini takomillashtirish orqali sohani isloh qilishni izchil davom ettirish chora-tadbirlari to‘g‘risida”gi farmonga ko‘ra, tajriba-sinov loyihasi doirasida birlamchi tibbiy-sanitariya yordami muassasalari tibbiyot xodimlari bazaviy tarif stavkalariga quyidagi miqdorlarda qo‘shimcha ustamalar to‘lanadi:
- sayyor tibbiy xizmat ko‘rsatuvchi tibbiyot xodimlariga oylik lavozim maoshi yoki bazaviy tarif stavkasining 50 foizi miqdorida;
- tibbiyot brigadasiga belgilangan me’yorlardan 10 foiz ortiqcha qo‘shimcha biriktirilgan aholining har biri uchun mehnatga haq to‘lash eng kam miqdorining 0,3 foizi miqdorida — shaharlarda, 0,5 foizi miqdorida — tumanlarda;
- oila salomatligi bo‘yicha maxsus o‘quv dasturi asosida tashkil etiladigan kurslarning barcha bosqichlarini muvaffaqiyatli tugatgan tibbiyot xodimlari uchun sertifikatga muvofiq bazaviy tarif stavkasining 100 foizi miqdorida.
Tajriba-sinov loyihasi doirasida tuman (shahar) markaziy shifoxonalarida shifokorlarning oylik lavozim maoshlari — 20 foiz, o‘rta tibbiyot xodimlarining oylik lavozim maoshlari — 10 foiz miqdorida oshiriladi.
Tajriba-sinov loyihasi doirasida oilaviy poliklinikalar va tuman (shahar) markaziy shifoxonalarining tibbiyot va farmatsevtika xodimlari uchun faoliyat samaradorligi ko‘rsatkichlari (KPI) asosida oylik lavozim maoshining 100 foizigacha miqdorda ustama joriy etiladi.
Tajriba-sinov loyihasi 2025-yil 1-iyuldan farmonda belgilangan ayrim tuman (shahar)larda, 2026-yil 1-yanvardan Samarqand viloyatining barcha tuman (shahar)larida joriy qilinadi.
Sog‘liqni saqlash tizimini tashkil etishning yangi modeli tajriba-sinov tariqasida joriy qilinadigan hududlar ro‘yxati:
- Qoraqalpog‘iston Respublikasi Chimboy tumani;
- Andijon viloyati Asaka tumani;
- Buxoro viloyati G‘ijduvon tumani;
- Jizzax viloyati G‘allaorol tumani;
- Qashqadaryo viloyati Kitob tumani;
- Navoiy viloyati Xatirchi tumani;
- Namangan viloyati Chortoq tumani;
- Samarqand viloyati Samarqand shahri hamda Bulung‘ur va Ishtixon tumanlari;
- Surxondaryo viloyati Denov tumani;
- Sirdaryo viloyati Sirdaryo tumani;
- Toshkent viloyati Yangiyo‘l shahri;
- Farg‘ona viloyati Quva tumani;
- Xorazm viloyati Shovot tumani.
Izoh (0)