KXDRdagilar Barak Obamaning YouTube’ga bergan intervyusida aytgan gaplaridan hayratga tushdi

AQSh prezidenti Barak Obamaning YouTube’dagi intervyusi KXDRda keskin tanqidga uchradi, deya xabar bermoqda “TASS”.

Unda Obama amerikaliklarga Shimoliy Koreya rejimi qulashini va’da qilgan edi. “Vaqt o‘tishi bilan siz ushbu rejim ag‘darilishini ko‘rasiz”, — dedi Obama va bunga urushsiz yo‘l bilan erishilishini qo‘shimcha qildi.

Bundan tashqari, u KXDRni yadroviy va harbiy salohiyatini faol oshirib borayotgan “eng izolyatsiyalangan, sanksiyalarga eng ko‘p uchragan va dunyodan ajralib qolgan mamlakat” deb atadi.

KXDR tashqi ishlar vaziri vakili ta’kidlashicha, Pxenyandagilar “yirik davlat prezidenti Shimoliy Koreya haqida bunday noto‘g‘ri tushunchaga ega ekanligi va suveren davlatga nisbatan dushmanlarcha munosabatda ekanligidan hayratga tushgan”.

Nashrning eslatishicha, Obama 22-yanvar, payshanba kuni to‘g‘ridan-to‘g‘ri internet-efirda YouTube’dagi ba’zi kanallar mualliflari savollariga javob bergan edi.