Xitoyning Poly Technologies Inc kompaniyasi O‘zbekistonda 184 million dollarlik rezinotexnika buyumlari zavodini quradi. Tegishli qaror O‘zbekiston Prezidenti tomonidan tasdiqlandi (pdf).
Hujjatda aytilishicha, to‘g‘ridan-to‘g‘ri muzokaralar natijalariga ko‘ra, “O‘zkimyosanoat” DAKning “Rezinotexnika buyumlari zavodi qurilishi direksiyasi” MChJ hamda Poly Technologies Inc (Xitoy Xalq Respublikasi) kompaniyasi o‘rtasida qiymati 183,96 million AQSh dollariga teng bo‘lgan bir yilda 100 ming pogon metr konveyer lentalari, 200 ming dona qishloq xo‘jaligi shinalari va 3 million dona avtomobil shinalari ishlab chiqaradigan zavodni foydalanishga tayyor holda qurish to‘g‘risida shartnoma tuzildi.
Loyiha O‘zbekiston Respublikasi Tiklanish va taraqqiyot jamg‘armasining 27,60 million dollar miqdoridagi kredit mablag‘lari yordamida moliyalashtiriladi. Bundan tashqari, 156,36 million dollarlik imtiyozli uzoq muddatli xorijiy kreditlarni jalb etish ko‘zda tutilgan.
“Asaka” DATB O‘zbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi va “O‘zkimyosanoat” DAK bilan birga bir oy muddatda xorijiy banklar va boshqa moliya institutlari bilan mazkur loyihani birgalikda moliyalashtirish uchun imtiyozli uzoq muddatli kreditlarni jalb etishni o‘rganib chiqadi.
Hujjatda zavodni qurish ishlari 2016-yil 1-yanvarigacha tugallanishi qayd etildi.
Izoh (0)