Хитойнинг Poly Technologies Inc компанияси Ўзбекистонда 184 миллион долларлик резинотехника буюмлари заводини қуради. Тегишли қарор Ўзбекистон Президенти томонидан тасдиқланди (pdf).
Ҳужжатда айтилишича, тўғридан-тўғри музокаралар натижаларига кўра, «Ўзкимёсаноат» ДАКнинг «Резинотехника буюмлари заводи қурилиши дирекцияси» МЧЖ ҳамда Poly Technologies Inc (Хитой Халқ Республикаси) компанияси ўртасида қиймати 183,96 миллион АҚШ долларига тенг бўлган бир йилда 100 минг погон метр конвейер ленталари, 200 минг дона қишлоқ хўжалиги шиналари ва 3 миллион дона автомобиль шиналари ишлаб чиқарадиган заводни фойдаланишга тайёр ҳолда қуриш тўғрисида шартнома тузилди.
Лойиҳа Ўзбекистон Республикаси Тикланиш ва тараққиёт жамғармасининг 27,60 миллион доллар миқдоридаги кредит маблағлари ёрдамида молиялаштирилади. Бундан ташқари, 156,36 миллион долларлик имтиёзли узоқ муддатли хорижий кредитларни жалб этиш кўзда тутилган.
«Асака» ДАТБ Ўзбекистон Республикаси Ташқи иқтисодий алоқалар, инвестициялар ва савдо вазирлиги, Молия вазирлиги ва «Ўзкимёсаноат» ДАК билан бирга бир ой муддатда хорижий банклар ва бошқа молия институтлари билан мазкур лойиҳани биргаликда молиялаштириш учун имтиёзли узоқ муддатли кредитларни жалб этишни ўрганиб чиқади.
Ҳужжатда заводни қуриш ишлари 2016 йил 1 январигача тугалланиши қайд этилди.
Изоҳ (0)