O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamenti xodimlari tomonidan o‘tkazilgan tekshirish va tadbirlarda o‘qituvchi kasbini egallash maqsadida qalbaki hujjat tayyorlagan shaxs qo‘lga olindi. Bu haqda “Huquq” gazetasi xabar berdi.
Ma’lum bo‘lishicha, Farg‘ona viloyatining So‘x tumanida yashovchi fuqaro Olimjon Turdiyev (ism-familiyasi o‘zgartirilgan)ning 2012-yilda Farg‘ona shahrida dastlabki tergov va sud jarayonida shaxsini aniqlashning imkoni bo‘lmagan Erkin ismli shaxs bilan tanishadi va uning qo‘lidan Qo‘qon Davlat pedagogika institutining diplomini tayyorlab berish kelishini eshitib, shu masalada iltimos qila boshlaydi.
Erkin bu iltimosni rad eta olmaydi va ko‘p o‘tmay yaxshigina xizmat haqi evaziga O.Turdiyev ushbu institutning “Jismoniy tarbiya va jismoniy madaniyat fakulteti”ni tamomlaganligi haqidagi qalbaki diplom hamda ilovasini unga tutqazadi. O.Turdiyev esa diplom qalbaki ekanligini bilsa-da, bemalol So‘x tumanidagi maktablarning biriga taqdim etadi va ushbu dargohda jismoniy tarbiya fani o‘qituvchisi vazifasida ish boshlaydi.
Sudga oid xatshunoslik ekspertizasining xulosasiga ko‘ra, ushbu diplom va uning ilovasi rangli printer yordamida qalbakilashtirilganligi hamda Qo‘qon Davlat pedagogika institutining ma’lumotnomasidan O.Turdiyev ushbu dargohni tamomlamaganligi ma’lum bo‘ldi.
Izoh (0)