Facebook’ning o‘zbekistonlik foydalanuvchilari Toshkentda Coca-Cola’ning Yangi yil yuk mashinalari paydo bo‘lgani, ular shaharning turli nuqtalarida to‘xtab, o‘tkinchilarga bepul sovg‘alar ulasha boshlaganini ma’lum qildi.
Potrebitel.uz guruhi foydalanuvchisi bunday yuk mashinasiga Alisher Navoiy nomidagi istirohat bog‘i yaqinida duch kelganini va o‘yinchoq ayiqchaga ega bo‘lganini yozgan hamda dalil sifatida fotosuratlarni ilova qilgan.
Muallifning aniqlik kiritishicha, sovg‘ani olish uchun yuk mashinasiga yaqinlashib, undagi tugmachani bosish kerak, shunda darcha ochilib, Coca-Cola logotipi tushirilgan sharf, futbolka, ayiqcha, kola ichimligi yoki boshqa sovg‘alar chiqarib beriladi.
Xabarga yozilgan izohlarda ko‘pchilik ushbu aksiyani qo‘llab-quvvatlagan va Coca-Cola yuk mashinalari yo‘nalishi bilan qiziqqan. Foydalanuvchilar ularni shaharning turli nuqtalarida ko‘rganini qayd etgan.
Coca-Cola Bottlers Uzbekistan Ltd’ning Facebook’dagi sahifasida Yangi yil yuk mashinalari yo‘nalishi haqida qoldirilgan savollarga mujmal javob berilib, ularning shahar markazi bo‘ylab yurishi aytilgan.
Izoh (0)