Avval xabar berganimizdek, 28-noyabr kuni Termiz shahrida Amir Temur ordenini topshirishga bag‘ishlangan tantanali marosim bo‘lib o‘tdi. Marosimda O‘zbekiston Respublikasi Prezidenti Islom Karimov nutq so‘zladi, uning to‘liq matnini O‘zA e’lon qildi.
Prezident o‘z nutqida og‘ir iqlim sharoitiga qaramasdan, Surxon vohasi dehqon va fermerlarining keyingi yillarda qo‘lga kiritayotgan yutuqlarini tilga oldi.
“Bu haqda gapirganda, bugungi kunda yurtimizda yetishtirilayotgan paxta xomashyosining 10 foizi, g‘allaning qariyb 8 foizi mana shu saxovatli zamin hissasiga to‘g‘ri kelishini alohida ta’kidlash lozim. Viloyatda joriy yilda 335 ming tonnadan ziyod paxta, 477 ming tonna g‘alla yetishtirilgani, so‘zsiz, mashaqqatli va mardona mehnat natijasidir”, — dedi Islom Karimov.
Prezident fursatdan foydalanib, viloyatning mirishkor dehqon va fermerlariga, barcha qishloq xo‘jaligi xodimlariga fidokorona mehnatlari uchun samimiy minnatdorlik bildirdi.
Izoh (0)