Osiyo Futbol Konfederatsiyasi U-16 o‘smir qizlar o‘rtasidagi Osiyo chempionati — 2015 saralash bahslari mezbonligini Vyetnamdan Bahraynga ko‘chirdi. Bu haqda O‘zbekiston Futbol Federatsiyasi xabar bermoqda.
Eslatib o‘tamiz, avvalroq O‘zbekiston U-16 o‘smirlar terma jamoasi saralashning “A” guruhida Shri-Lanka, Bahrayn, Falastin, Qirg‘iziston va Tojikiston U-16 o‘smir qizlariga qarshi o‘ynashi ma’lum bo‘lgan edi. Saralash bahslariga esa 4—13-oktabr kunlari Vyetnam mamlakati mezbonlik qilishi kerak edi. Ammo OFK yakunda mazkur musobaqa mezbonligini Vyetnamdan Bahraynga ko‘chirdi. Ta’kidlash lozim, mazkur saralash guruhida ishtirok etishi lozim bo‘lgan to‘rt terma jamoa — Tojikiston, Qirg‘iziston, Falastin va Shri-Lanka U-16 qizlar terma jamoalari o‘z xohishlariga ko‘ra saralash o‘yinlarida ishtirok etmaydigan bo‘ldi. Shu tariqa, “A” guruhida faqat ikki terma jamoa — Bahrayn va O‘zbekiston U-16 qizlari Osiyo chempionati final bosqichi yo‘llanmasi uchun kurash olib boradigan bo‘ldi.
OFK tasdiqlagan reglamentga muvofiq Bahrayn va O‘zbekiston terma jamoalari 22 va 25-dekabr kunlari o‘zaro ikki marta o‘yin o‘tkazadi va g‘olib nomini aniqlab oladi.
Ma’lumot uchun, 2013-yil o‘tkazilgan U-16 Osiyo chempionatida dastlabki to‘rt o‘rinni egallagan terma jamoalar (Yaponiya, KXDR, Xitoy, Tailand) 2015-yilgi Osiyo chempionati final bosqichiga saralash o‘yinlarisiz yo‘llanmani qo‘lga kiritgan.
Izoh (0)