Осиё Футбол Конфедерацияси U-16 ўсмир қизлар ўртасидаги Осиё чемпионати — 2015 саралаш баҳслари мезбонлигини Вьетнамдан Баҳрайнга кўчирди. Бу ҳақда Ўзбекистон Футбол Федерацияси хабар бермоқда.
Эслатиб ўтамиз, аввалроқ Ўзбекистон U-16 ўсмирлар терма жамоаси саралашнинг «А» гуруҳида Шри-Ланка, Баҳрайн, Фаластин, Қирғизистон ва Тожикистон U-16 ўсмир қизларига қарши ўйнаши маълум бўлган эди. Саралаш баҳсларига эса 4—13 октябрь кунлари Вьетнам мамлакати мезбонлик қилиши керак эди. Аммо ОФК якунда мазкур мусобақа мезбонлигини Вьетнамдан Баҳрайнга кўчирди. Таъкидлаш лозим, мазкур саралаш гуруҳида иштирок этиши лозим бўлган тўрт терма жамоа — Тожикистон, Қирғизистон, Фаластин ва Шри-Ланка U-16 қизлар терма жамоалари ўз хоҳишларига кўра саралаш ўйинларида иштирок этмайдиган бўлди. Шу тариқа, «А» гуруҳида фақат икки терма жамоа — Баҳрайн ва Ўзбекистон U-16 қизлари Осиё чемпионати финал босқичи йўлланмаси учун кураш олиб борадиган бўлди.
ОФК тасдиқлаган регламентга мувофиқ Баҳрайн ва Ўзбекистон терма жамоалари 22 ва 25 декабрь кунлари ўзаро икки марта ўйин ўтказади ва ғолиб номини аниқлаб олади.
Маълумот учун, 2013 йил ўтказилган U-16 Осиё чемпионатида дастлабки тўрт ўринни эгаллаган терма жамоалар (Япония, КХДР, Хитой, Таиланд) 2015 йилги Осиё чемпионати финал босқичига саралаш ўйинларисиз йўлланмани қўлга киритган.
Изоҳ (0)