Австралияликлар мамлакат бош вазири Тони Эбботт баёнотидан ғазабга келди, дея хабар бермоқда «РИА Новости». Гап шундаки, Эбботт 1788 йилда Британия мустамлакасига айлангунига қадар, Австралияда «буталардан бошқа ҳеч нарса бўлмагани»ни айтди.
«Бу салобатли шаҳарга қараб, унинг қанчалик ривож топганини кўриш мумкин. 1788 йилда бу ерда буталардан бошқа ҳеч нарса бўлмаганини тасаввур қилиш қийин. Бу ердан бир неча юз ярд нарига келиб тушган аскарлар ва денгизчилар ўзларини Ойга келиб қолгандек ҳис қилган бўлса ажаб эмас», — деди Эбботт.
Эбботт буни Сиднейда Буюк Британия бош вазири Дэвид Кэмерон билан учрашув чоғида сўзлаган нутқида айтиб ўтди. Унинг баёнотида Австралиянинг туб аҳолиси ва уларнинг мамлакатга қўшган ҳиссаси тилга олинмади.
Ижтимоий тармоқлар фойдаланувчилари Эбботтнинг гапига нисбатан ғазабли изоҳлар билдирди. «40 минг йиллик тарих «буталардан бошқа ҳеч нарса» деган ибора билан ўчириб ташланди», — деб ёзади Twitter фойдаланувчиларидан бири. «Оқ танли мустамлакачилар келгунича, ерларимиз Ердаги энг қадимий маданиятга бой эди», — дейилади яна бир изоҳда.
Изоҳ (0)