Xitoydan keltirilgan 75 million so‘mlik traktor ehtiyot qismlarini Toshkentga noqonuniy olib kirishga urinilgani aniqlandi

Davlat byujdetiga undiriladigan bojxona to‘lovlarining to‘liq va o‘z vaqtida undirilishini ta’minlash, shuningdek, bojxona qoidabuzarliklarining oldini olish maqsadida respublika bojxonachilari tomonidan izchil chora-tadbirlar amalga oshirilmoqda, deb xabar beradi Toshkent shahar bojxona boshqarmasining axborot xizmati.

Xususan, Toshkent shahar bojxona boshqarmasining “Toshkent-tovar” tashqi iqtisodiy faoliyat bojxona posti xodimlari tomonidan poytaxtdagi “R.T.S.P” MChJ (maqolada tashqi iqtisodiy faoliyat ishtirokchilarining nomlari o‘zgartirib ko‘rsatilgan) tomonidan Xitoydan keltirilgan traktor ehtiyot qismlari bojxona ko‘rigidan o‘tkazilganda mazkur tovarlar yuk-kuzatuv hujjatlarida qayd etilganiga nisbatan salkam 14,5 tonna og‘ir ekanligi aniqlandi. Bojxona yuk deklaratsiyasidan “tushib” qolgan mazkur ortiqcha ehtiyot qismlarning umumiy qiymati 75 million so‘mni tashkil qilishi aniqlandi.

Shuningdek, post xodimlari tomonidan “G.D.B.” MChJga tegishli xo‘jalik tovarlari ko‘zdan kechirilganda, mazkur tashkilot Birlashgan Arab Amirliklaridan 32 million so‘m qiymatdagi 7,5 ming donaga yaqin xo‘jalik buyumlarini ortiqcha olib kirgani ma’lum bo‘ldi.

Xususiy tadbirkor A.R. nomiga Xitoydan keltirilgan elektr uskunalariga tegishli yuk-kuzatuv hujjatlari va bojxona yuk deklaratsiyasini rasmiylashtirish chog‘ida bojxonachilar hujjatlarda qayd etilgan raqamlarning mavjud tovarlar miqdoriga nisbatan tafovut qilishini payqab qoldi. Natijada, hujjatlarda ko‘rsatilmagan qiymati 13 million so‘mdan ortiq, salkam 600 dona turli xil xo‘jalik mollarining hech qanday bojxona to‘lovlarisiz ichki bozorga kiritilishining oldi olindi.

Poytaxtdagi “Sirg‘ali” tashqi iqtisodiy faoliyat bojxona posti xodimlari tomonidan ham shu turdagi qonunbuzarliklarning oldi olindi. Jumladan, “R.T.” MChJ nomiga Xitoydan keltirilgan amortizatorlarni bojxona ko‘rigidan o‘tkazish natijasida 24 million so‘m qiymatga teng 1,5 tonna og‘irlikdagi amortizartorlar hujjatlardan “tushib” qoldirilgani fosh bo‘ldi.

Temir yo‘l konteynerlaridan birini ko‘zdan kechirish vaqtida xususiy tadbirkor N.B. nomiga keltirilgan kosmetika vositalari va xo‘jalik buyumlari orasiga yuk-kuzatuv hujjatlarida ko‘rsatilmagan 550 kilogramm og‘irlikdagi stol lampalarining qanday qilib tushib qolgani hozirda “Chuqursoy” tashqi iqtisodiy faoliyat bojxona posti xodimlari tomonidan surishtirilmoqda.

Yuqoridagi barcha holatlar yuzasidan bojxona tekshiruvlari va surishtiruv harakatlari davom ettirilmoqda.