Хитойдан келтирилган 75 миллион сўмлик трактор эҳтиёт қисмларини Тошкентга ноқонуний олиб киришга уринилгани аниқланди

Давлат бюждетига ундириладиган божхона тўловларининг тўлиқ ва ўз вақтида ундирилишини таъминлаш, шунингдек, божхона қоидабузарликларининг олдини олиш мақсадида республика божхоначилари томонидан изчил чора-тадбирлар амалга оширилмоқда, деб хабар беради Тошкент шаҳар божхона бошқармасининг ахборот хизмати.

Хусусан, Тошкент шаҳар божхона бошқармасининг «Тошкент-товар» ташқи иқтисодий фаолият божхона пости ходимлари томонидан пойтахтдаги «Р.Т.С.П» МЧЖ (мақолада ташқи иқтисодий фаолият иштирокчиларининг номлари ўзгартириб кўрсатилган) томонидан Хитойдан келтирилган трактор эҳтиёт қисмлари божхона кўригидан ўтказилганда мазкур товарлар юк-кузатув ҳужжатларида қайд этилганига нисбатан салкам 14,5 тонна оғир эканлиги аниқланди. Божхона юк декларациясидан «тушиб» қолган мазкур ортиқча эҳтиёт қисмларнинг умумий қиймати 75 миллион сўмни ташкил қилиши аниқланди.

Шунингдек, пост ходимлари томонидан «Г.Д.Б.» МЧЖга тегишли хўжалик товарлари кўздан кечирилганда, мазкур ташкилот Бирлашган Араб Амирликларидан 32 миллион сўм қийматдаги 7,5 минг донага яқин хўжалик буюмларини ортиқча олиб киргани маълум бўлди.

Хусусий тадбиркор А.Р. номига Хитойдан келтирилган электр ускуналарига тегишли юк-кузатув ҳужжатлари ва божхона юк декларациясини расмийлаштириш чоғида божхоначилар ҳужжатларда қайд этилган рақамларнинг мавжуд товарлар миқдорига нисбатан тафовут қилишини пайқаб қолди. Натижада, ҳужжатларда кўрсатилмаган қиймати 13 миллион сўмдан ортиқ, салкам 600 дона турли хил хўжалик молларининг ҳеч қандай божхона тўловларисиз ички бозорга киритилишининг олди олинди.

Пойтахтдаги «Сирғали» ташқи иқтисодий фаолият божхона пости ходимлари томонидан ҳам шу турдаги қонунбузарликларнинг олди олинди. Жумладан, «Р.Т.» МЧЖ номига Хитойдан келтирилган амортизаторларни божхона кўригидан ўтказиш натижасида 24 миллион сўм қийматга тенг 1,5 тонна оғирликдаги амортизарторлар ҳужжатлардан «тушиб» қолдирилгани фош бўлди.

Темир йўл контейнерларидан бирини кўздан кечириш вақтида хусусий тадбиркор Н.Б. номига келтирилган косметика воситалари ва хўжалик буюмлари орасига юк-кузатув ҳужжатларида кўрсатилмаган 550 килограмм оғирликдаги стол лампаларининг қандай қилиб тушиб қолгани ҳозирда «Чуқурсой» ташқи иқтисодий фаолият божхона пости ходимлари томонидан суриштирилмоқда.

Юқоридаги барча ҳолатлар юзасидан божхона текширувлари ва суриштирув ҳаракатлари давом эттирилмоқда.